Vittus: Isumaqatigiissut pakatsinarpoq

Parisimi COP21-mi nunanit 195-nik silap kiatsikkiartunnginnissaanut oqaluttuarisaanikkut isumaqatigiissut nuannaarutigineqaqisumik ippassaq isumaqatigiissutigineqarpoq. FN-ip generalsekretæriata, Ban-Ki-Moonip nunarsuarmi nunat nersualaarpai, nunarsuarmi inuiaat mianerisariallit tusaaniarneqarsimammata.
Assi © : Naalakkersuisut
Allattoq Kerté Jeremiassen
decembarip 13-at 2015 19:20

Kalaallit Nunaalli sinnerlugu peqataasoq, Nunanut allanut naalakkersuisoq, Vittus Qujaukitsoq Parisimi isumaqatigiissut, pakatsissutigalugu tugassiutitigut nalunaaruteqarpoq:

- Nunap inoqqaavi silap pissusaata allangoriartorneranut ajoqusiisumut, ullumikkut nunarsuaq tamakkerlugu sunniisumut, annikitsuaraannarmik sunniuteqarsimapput. Taamaakkaluartoq silap pissusaanut isumaqatigiissummi atsioqataasut, nunap inoqqaavisa pisinnaatitaaffii immikkuullarissut, ilaatigut FN-imi Nunap Inoqqaavisa Pisinnaatitaaffii pillugit Nalunaarummi akuerineqarsimasut, ataqqisinnaasimanngilaat. Tamanna annertuumik pakatsinarpoq, Vittus Qujaukitsoq nalunaarummi ilaatigut allappoq.

Inuiaqatigiit nunanit tamalaaneersut isumaqatigiissutip oqaasertaanni uppernarsarsimasariaqaraluaraat, Vittus Qujaukitsoq ilanngullugu aamma oqaatigaa.

Nunarsuarmi silap kiatsikkiartornera 1,5 grademik taamaallaat qaffannissaa isumaqatigiissummi siunniunneqarpoq. Aningaasallu ukiumut 100 milliardilit dollarsit silap kiatsinngiartunnginnissaanut nunanut ineriartorfiusunut 2020-ip tungaanut ukiut tamaasa tunniunneqartassasut COP21-mi ilaatigut isumaqatigiissutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq