MISISSORPARPUT Vittup suliffissaaleqineq annikillisinngilaa
- Qaammatit kingulliit 18-it kingumut qiviarutta, taamani suliffissaaleqisut 5000-iupput. Maannalu qaammatit 18-it qaangiunnerini suliffissaleqisut 3000-inut ikilisinneqarsimapput. Apereriannga tamanna qanoq angusimaneripput? Vittus Qujaukitsoq Sisimiuni qineqqusaartoqarmat taama oqarpoq.
Vittus Qujaukitsulli aningaasaqarniarnikkut tupinnartuliatut isikkoqartumut nassuiaateqartinnissaa pisariaqanngilaq. Suliffissaaleqisummi pillugit kisitsisitigut paasissutissat tamanna erseqqilluinnartumik takutippaat.
Iipilit pærillu
Taakkunanimi erseqqilluinnartumik allassimavoq Vittus Qujaukitsup Naalakkersuisulli sinnerisa suliffissaaqineq iluarsiissuteqarfigisimanngikkaat. Suliffissaaleqinerulli ukiup qanoq ilinera apeqqutaatillugu allanngorarfiusarnera Qujaukitsup arajutsisimannguatsiarpaa.
Taamaammat Sulisitsisut peqatigiiffianni pisortaq aperaarput kisitsisit januaarimeersut kisitsisinut septembarimeersunut asersuutissallugit silatusaarnerunersoq.
- Taamaaliortoqarsinnaanngilaq. Tassa taamaappoq. Assigiinnarpaa iipilit peerillugu assersuukkaanni, Brian Buus Pedersen taama oqarpoq.
Eqqortumik nassuiaanani salloqittaaneq
- Kisitsisitigut paasissutissanut suugaluartunulluunniit tunngatillugu, ukiup qanoq ilinerani allanngorarfiusut paaseqqaartinnagit piviusoq eqqortumik paasineqarsinnaanngilaq.
- Aamma kisitsisitigut paasissutissanik taamatut atuineq piviusorsiortuunngilaq. Kisitsisitigut paasissutissat taamatut atorniaraanni salloqittaanerussaaq pissutsillu qanorpiaq inissisimanerinik erseqqissumik nassuiaanerunani, Sulisitsisut Peqatigiiffianni pisortaq, Brian Buus Pedersen, taama oqarpoq.
Naatsorsueqqissaartarfik naapertorlugu, januaarip qaammataani 2013-imi suliffissaaleqisut 4808-nerat eqqorpoq. Ukiorlu ataaseq qaangiummat suliffissaaleqisut 4994-iupput, tassalu amerleriarsimallutik.
Suliffissaaleqisullu septembarip qaammataani 3061-iupput, ukiup siuliani 2943-simallutik. 118-inik ikinnerullutik.
2014-imi suliffissaaleqisut amerlassusaat nalinginnaasumik 2013-imut naleqqiullugit amerlanerupput. Juulimili, aggustimi septembarimilu ukiup siulianut naleqqiullugit ikilerialaarput.
Kisitsisit ilisimanerunngikkai
Taamaakkaluartoq Vittus Qujaukitsoq ippassaq qineqqusaartoqarnerani erseqqilluinnartumik oqaluppoq.
- Inuit 10.000-it ukioq manna suliffissarsiorsimapput. Suliffissaaleqinerlu Siumup naalakkersuisuutitaqarnerani annikillisinneqarsimanngilaq. Killormulli pisoqarsimalluni.
- Kisitsisit qanoq ikkamik?
- Kisitsisit takutippaat maannakkorpiaq 2943-t suliffissaaleqisut. Paasitinneqarneralu naapertorlugu aaqqissuteqarfigineqarsimanngillat. Killormulli amerliartuinnarsimapput.
- Uanga kisitsisit ilisimaneruakka. Qujaukitsoq taama oqarpoq.
Taamaattoqannginneranik oqalunneq ikkappallaaqaaq
Sulisitsisulli peqatigiiffiata pisortaata nunatta karsianut pisortaagallartoq isumaqatiginngilaa.
- Naagga, tamanna eqqunngilaq. Kisitsisit januaarimeersut kisitsisinut septembarimeersunut assersuuppagit, taava soorunami aallakaatitsivimmi apersuisoq eqqortumik oqaluppoq. Tassa taamaappoq. Taamaattoqannginneranik oqalunneq ikkappallaaqaaq. Eqqunngitsumik paasissutissiineruvoq, Brian Buus Pedersen taama oqarpoq.
