Kielsen: Vittup inuit allat suliaat akuliuffigisarpai
Vittus Qujaukitsup nunanut allanut naalakkersuisuujunnaarnissaa Kim Kielsenip kissaatigisimavaa, Qujaukitsulli tamanna isumaqataaffiginagu Naalakkersuisuni ilaasortaajunnaarluni Facebookkikkut ataasinngormat ullaakkut nalunaarutigaa.
Aamma atuaruk Vittus akerliugami naalakkersuisuujunnaartoq
Angutit taakku marluk namminiilivinnissamut Naalagaaffeqatigiinnermullu tunngatillugu politikkikkut siunnerfik pillugu isumaqatigiinngittarnerat ilisimaneqareerpoq. Kim Kielsenili naapertorlugu Vittus Qujaukitsup nunanut allanut naalakkersuisuujunnaarsinneqarneranut tamanna pissutaanngilaq:
- Naalakkersuisut ataasiakkaat eqqarsaatigalugit suliassaqarfiit annertuupilussuit akisussaaffigai. Inuussutissarsiornermut, niuernermut, nukissiuuteqarnermut nunanullu allanut suliassaqarfiit. Naalakkersuisoqarfik imartuupilussuuvoq.
- Taamaammat Naalakkersuisuni oqimaaqatigiissitsinissamik aalajangiivunga, nunanut allanut suliassaqarfik namminiilivinnissamut naalakkersuisoqarfiup ataanut nuullugu.
Tupaallatsitsisartoq
Vittus Qujaukitsoq Naalagaaffeqatigiinneq nunattalu namminiilivinnissaa pillugit sakkortuumik oqaaseqartarnermigut Nunatsinni Danmarkimilu arlaleriarluni tupaallatsitsisarpoq. Tamanna ilaatigut siorna decembarip qaammataani pivoq, Danmarkip anneruniarnera 'Naalagaaffeqatigiinni atassuteqarnitsinnut aserorsaataalluinnartutut' oqaatigigamiuk.
Aamma atuaruk Danmarkip anneruniarnera aserorsaataalluinnarpoq
Qujaukitsup tamatumunnga atatillugu erseqqissaatigaa Nunatta namminiilivinnissamik kissaateqarneranut USA-llu Nunatsinni sakkutooqarfeqarneranut atatillugu nunatta kissaatigisaanik Danmark tusaaniarnerulinngippat Nunarput Kunngeqarfimmit Danmarkimit aniinnariaasoq.
Taamatullu oqarnera Kim Kielsenip isumaqatiginagu tamanut ammasumik nalunaarutigaa. Isumaqatigiinngissutigineqartullu Qujaukitsup nunanut allanut naalakkersuisuujunnaarsinnissaanut pissutaanngitsut partiip naalakkersuisullu siulittaasuata suli aalajangiusimavaa.
Aamma atuaruk Kim Kielsenip Vittus Qujaukitsoq suli tatigigaa
Periaaserisartagai isumaqatiginngikkai
Kim Kielsenilli tamatumunnga peqatigitillugu oqaatigaa naalakkersuisutut tunuartoq naalakkersuisuni tamatigut eqqortumik pissusilersortarsimanngitsoq.
- Iliuuseqartoqarnissaa Naalakkersuisuni isumaqatigiissutigaarput. Aammali suut oqariartuutigineqarsimanersut matumani pineqarput.
- Naalakkersuisuni naalakkersuisoqarfiit akisussaaffeqarfiillu allat qulaatiinnarlugit sulisoqassanngilaq. Naalakkersuisuni ilaasortat akisussaaffeqarfigisaminni sulissapput, naalakkersuisunilu ilaasortat allat akisussaaffeqarfii oqaaseqarfigissallugit kissaateqaraanni naalakkersuisoqarfik pineqartoq tamatigut isumasioqqaarlugu avammut oqaaseqartoqartassaaq. Tamannali tamatigut pisarsimanngilaq.
