Visit Greenlandip Ole Dorph paasisinnaanngilaat

Suliniutilli piviusunngortinnissaanut Qaasuitsup Kommuniata borgemesteria, Ole Dorph akimmisaarivoq. Tassa suliniut pillugu Ilimanami nubnarfimmiut tusarniarneqarmata oqaatigaa nammineq inuttut borgmesteriunngitsutut takkulluni tusarniaanermut peqataagami. Tusarniaanermini nunaqarfimmi innuttaasunut oqaatigaa, Realdaniap aningaasaliinera nunasiaataasimanermi pissutsinut utersaarnerusoq, suliullu Ilimanami innuttaasunut ajortumik kinguneqassasoq oqaatigalugu.

Nunasiaataasimanermi pissutsinut Ole Dorphip oqarnera, Visit Greenlandimi pisortap, Anders Stenbakken-ip paasisinnaannginnerarpaa.

- Nunasiaataasimanerup naliganitut assigusumik Ilimanami pilersaarusiortoqarneranik Ole Dorphip oqarnera paasisinnaanngilara. Suliniutinut allanut naleqqiullugu Ilimanami suliniut pilersaarusiorluagaavoq.

Anders Stenbakkenip ilanngullugu oqaatigaa, suliniummi ilanngunneqarsimasut tunngaviatigut pitsaasuummata nunaqarfimmilu innuttanut tulluarsagaasut suliniutaasimasunut allanut naleqqiullugit pitsaanerullutik.

Anders Stenbakkenip aamma oqaatigaa, suliniut ataatsimut isigalugu taanna Nunatsinnut tamarmut iluaqutaasinnaasoq.

- Ilimanami suliniut naammassineqarpat, tamanna Nunatsinni allani, takornariaqarnermik suliniuteqartuni, atorluarneqarsinnaakutsoortussatut isigaara, Anders Stenbakken oqarpoq.

Ilulissani takornariartitsinermik suliaqartut ilaata aamma pilersaarusiummut suleqataasup, World of Greenlandip pisortaata, Ulf Klüppelip oqaatigaa, paasisinnaanagu sooq Ole Dorphip pilerssarut unitsinniartutut pissusilersorfigineraa.

- Isumaqarpunga borgmesteri aamma kommune sinnattuaqisut. Tassami aningaasaateqarfik 15 million koruunit angullugit aningaasaliiniarpoq, kommunimut innuttaasunilluunniit akissaajaataasussaanngitsumik. Aningaasaliissutit Nunatta iluaqutissarai, taamaattumik nuanniippoq paasillugu, Ilulissat nunat allat aningaasaaataannit isertitaqarusunngistoq, Ulf Klüppel oqarpoq.

World of Greenlanip suliniummut peqataanera unammilleqatigiinnermut akornusersuisutut oqaatigineqarpoq. Taama oqartoqarnera Ulf Klüppelip takusinnaannginnerarpaa.

- Aningaasaateqarfiup aperaatigut peqataarusunnginnersugut, tassami taakku takusinnaagamikku takornariartitsinermik annertuumik suliaqartuusugut, taama aperineqarnerput sooq ajoqusiisinnaasutut isigineqarnersoq paasisinnaanngilara.

Ulf Klüppelip aamma apeqquserpaa Ilimanami innuttaasunut tusarniaatitsinermi borgmesterip apeqqusiinera pissusilersorneralu.

- Borgemesteri qaqugukkut inuinnartut pissusilersornersoq qaqugukkullu borgemsteritut pissusilersornersoq innuttaasunut paasisitsiniaanermi takujuminaappoq. Tamannalu pissusissamisuunngilaq.

World of Greenlanip pisortaa, Ulf Klüppel naggasiivoq.