Assi: KNR

Ilisimatooq: Video ilumuunngitsunik nutaarsiassartalik ajorpoq

Ataatsimoortumik tapiissutit Danmarkimut uteqqiinnartarput - ilaatigut avataaneersut nunatsinni sulisut akissarsiaannut tuttarlutik.

Facebookimi quppernermi Isumasiorfimmi videomi, maannamut 17.000-it sinnerlugit takuneqarsimasumi 284-eriarlugulu ingerlateqqinneqarsimasumi, tamanna oqaatigimisaarneqarpoq.
 
Ilisimatusarfimmili inuiaqatigiinni pissutsinik ilisimatusartoq naapertorlugu tamanna fake newsiuvoq, tassalu eqqortortaqanngilaq.
 
- Taamaalluinnarpoq, aningaasaqarnikkummi pissutsit ataqatigiinnerillu piviusumik tunngaveqanngitsut saqqummiunneqarput, Birger Poppel taama oqarpoq.
 
Videomi oqaatigimisaarneqarpoq danskit naalagaaffiata ataatsimoortumik tapiissutai 3,7 milliardit koruunit missaanniittut Danmarkimut uteqqiinnartartut.

Videoliortup, Qarsoq Høegh-Damip, erseqqissaatigaa avataanit suliartortut ukiumut 2,7 milliardit koruuninik aningaasarsiortarmata, taamaattumillu ataatsimoortumik tapiissutinit 1 milliardi sinneruttartoq:
 
- Uanilu kisitsisini ilanngunneqanngillat Danmarkimit pisiuarnerit, aalisakkat tuneqqissimaneri, kalaallit Danmarkimut feeriaraangamik aningaasat tassunga tutsinneqartartut.
 
Qarsoq Høegh-Dam videoliamini ilaatigut taama oqarpoq.
 
Birger Poppelili naapertorlugu taamatut naatsorsuisoqarsinnaanngilaq, ataatsimoortumik tapiissutit nunatta aningaasaqarnerata tamarmiusut ilagimmatigit:

- Aningaasat ilaatigut Kalaallit Nunaanni ikiorsiissutinut atorneqartarput, aamma akissarsiaqartitsinermut atorneqartarput, akissarsianullu atorneqartut Kalaalit Nunaanni akileraarutigineqartarput nunamilu maani kaaviiartinneqarlutik, Birger Poppel taama oqarpoq.
 
Taamaammat inuiaqatigiinni pissutsinik ilisimatusartoq naapertorlugu ataatsimoortumik tapiissutit Danmarkimut uteqqittarnerinik inerniliisoqarsinnaanngilaq.
 
Taamaammat Birger Poppel isumaqarpoq nunatta aningaasaqarnera pillugu videomi kukkusumik saqqummiussisoqartoq:

- Isumaqarpunga tulluanngilluinartoq. isumaqartitsilersinnaammat aningaasat Danmarkimit tapiissutigineqartut soqutaarpianngitsut nunamit anniseqqinneqaannartarmata,))
 
Birger Poppel, Ilisimatusarfimmi inuiaqatigiinni pissutsinik ilisimatusartoq taama oqarpoq.

Qarsoq Høegh-Dam KNR-imut oqarpoq, Ataatsimoortumik tapiissutit tamakkerlutik nunatsinniit anninneqartarnerarlugit oqarani. Taakkua apeqqusiinarpai.

Oqallinermi ilanngussaq uukapaatitsiniutaasup inuiaqatigiinni oqallinnermik sangutsitsisinnaaneranik isumakulutoqarnera pasisinnaaneraa aperinearamik oqarpoq, kikkut tamarmik isummersinnaatitaasut.

Aningaasanut inatsimmi atuarneqarsinnaavoq nunatta karsiata isertitai tamarmiusut 7 milliardit koruunit missiliorai. Taakkulu affai sinnilaarlugit - 3,8 milliardit koruunit - Danmarkimit ataatsimoortumik tapiissutaapput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!