Venedig-mi saqqummersitsineq Kunngissap ammarpaa
- Kalaallit Nunaat uannut pingaaruteqarluinnarpoq, taamaammat maanngarlunga ammaanersiuinissamik periarfissinneqarama akuersivunga. Saqqummersitsissutigineqartussallu qimerloorakkit nuanneqaat, tassami ilisarnartorpassuupput Kalaallillu Nunaanniillu eqqaamasannik uteqqiatitsillutik, Kunngissaq Frederik oqarpoq.
- Kalaallimmi Nunaat uanga ilaquttammalu qangali uummammiorisuuarput, uanilu saqqummersitsitsinermi Kalaallit Nunaat kusanartumik nittarsaanneqarnera isiginnaariat allat aamma misigissagaat neriuutigaara.
- Ilami Kalaallit Nunaat immikkuullarilluinnartuunera ilisimalluarpara. Kalaallimmi pinngortitamut qanilluinnartutoqaapput asulu kusanartumik kultooritoqarsuaqarlutik. Kunngissaq Frederik taama oqarpoq.
- Una saqqummersitsineq Kalaallit Nunaannik nittarsaavigissallugu pissanganartuuvoq, periarfissallu suusinnaanerinik takutitsisuulluarluni.
- Saqqummersitsissutigineqartut pissanganartuupput piviusorsiorpalaartuullutillu. Kisiannilu una aamma eqqaamasariaqarpoq: Aap, periarfissarpassuaqarluarpoq, inerisaanerulli kingunerluutigisinnaasai aamma eqqaamasariaqarlutik. Kunngissaq Frederik oqarpoq.
Saqqummersitsitsinermi Kunngissarput arlaannik immikkuullarissorissorisaqarnersoq aperaarput.
- Saqqummiunneqartut ilaat soqutiginarteqaara, tassami Kalaallit ilaqutariit siunissami illugisinnaasaat saqqummersinneqartunut akuummat, illussammi taassuma anoraangajuttup - tassa avannaap oqquaniittussianngorlugu suliarineqarsimanerata saniatigut illussaq taanna sannaveeraqarpoq. Sannaveeqqamimi tassani aquuteralak imaluunniit piniutit suliarineqarsinnaasunngorlugit eqqarsaataasimapput tassalu illu tamarmi ulluinnarni inuunermi atugassiaassalluni. Nunarsuummi sinnerani angerlarsimaffigisat unnuiffissiaannartut atorneqarajupput, Kalaallillu nunaat issittorsuusinnaasarmat pinngitsoorani ineqarnissaq pisariaqartaqaluni. Taamaammat illussaq ullut tamaasa atugassiaq torrallataasoraara. Kunngissaq Frederik taama naggasiivoq.