Vega Sagittarius amutsivimmukarpoq
Umiarsuup assartuutip Vega Sagittariusip ajornartorsiornertaqanngitsumik Nuuk qimappaa. Umiarsuaq arfininngormat ullaakkut Nuummiit aallarnissamut akuerineqarpoq maannalu Europap avannaanut ingerlaarluni.
Maanna sapaatit akunneri marluk sinnerlugit ingerlareerput umiarsuup Nuup avataani Kangerup eqqaani ikkarlinneraniit. Ikkarlinneq pillugu eqqartuussivimmi suli nassuiaasoqanngilaq tassani paasiniarneqartussaammat umiarsuaq qanoq ililluni ikkarlissimanersoq.
Aamma suli ullulerneqarsinnaanngilaq umiarsuup usiisa nassiussat inussaminnut qaqugu tunniunneqarsinnaanerat. Nassiussat tigummineqarallarput umiarsuup kaanngartinniarneranut aningaasartuutit matussusernissaat qulakkeerneqarsimatinnagu.
Taamaammat nassiussat qaqugu tunniunneqarnissaat umiarsuaatillit Vega Reedereip aamma Royal Arctic Linep oqaatigisinnaanngikkallarpaat.
- Neriuppugut qularnaveeqqusiisoqarnissaa piaartumik inissikkumaartoq taamaasippat nassiussat tunniunneqarsinnaalissammata. Kisianni sillimmasiisarfiit arlallit suliamut attuumassuteqarmata tamanna piffissartornarpoq, Vega Reedereimeesoq Arend Brügge nassuiaavoq.