Uyarakq Peand-eLilu nipilersortartuni nersornaasigassatut innersuunneqarput
Saqqummersitaminnik "Kunngiitsuuffik"-mmik taaguusersimasartik pillugu elektroniskimik nipilersortartoq Uyarack rappertartorlu Peand-eL 2016-imi qinigassatut piukkunneqarput.
- Uyarakq rappertartorlu Peand-eL nipilersornerup silarsuaani akuerineqarsinnaasut sunniuteqarfigisimavaat, Nunat Avannarlerni innersuussisut allapput.
Nipilersortartut marluk saqqummersitaminni nipilersuutinik elektroniskiusunik hip-hopinillu misileraaffiusuni nipilersugatoqqanik ilanngussisarput, soorlu assersuutigalugit Ole Kristiansenip Sumekkullu atugaannik.
Nunat Avannarliit Nipilersortartunut Nersornaasiuttagaat 350.000 koruuninik aningaasartaqartoq, nipilersortartumut immikkuullarissumut, nipilersoriaatsimillu nutaaliortumut ukiormanna novembarip aallaqqaataani DR-ip tusarnaartitsisarfissuani tunniunneqassalluni.