Uummannarmiut Oscarinnannissamut neriupput
Tupaallaatigineqarpoq aallaqqaammullu uppernarpiarani. Filmi ’Inuk’ ukiut arlallit qaangiummata suliarineqarluni aallartinneqarmat Oscar-innannissamut piukkunneqarluni toqqagaanissaa takorloorneqarsimanngilaq. Filmip sananeqarnerani siunertaasimavoq Nunatsinni inuit Kalaallit Nunaannilu avannaarpiarsuani inuunerup filmiliarinissaa. Suliarli pitsaangaarmat nunat assigiinngitsut filminut nersornaasiuttagaat amerlasuut tunniunneqarput. Massakkullu nersornaasiinerit annersaat tullinnguuppoq.
- Siullermik tusaqqaarakku massakkutuulli nuannaarutigalugulu tulluusimaarutigitiginngilara. Pattalaarinninneruvoq taamatut nunami maani piginnaasallit filmiliarput ima torragitigimmassuk allaat Oscar-imut innersuullugu. Massakkullu Hollywoodimi inunnit filmip isummerfigineqarnissaa tullinnguuppoq. Meqqutip isaatigullusooq puttussinnaassagutta meeqqanut maanilu suliffeqarfimmi sulisunut pattalaarinninnerussaaq annertoorujussuaq, filmimi produceri Ann Andreasen knr.gl-imut oqarpoq.
Filmi ‘Inuk’ Kalaallit Nunaanni nunami isorartuumi inuiaat ikittunnguit najugaqartut pillugit oqaluttuaavoq. Pinngortitarsuaq alutornartoq ilanngukkaanni filmip tunniussaa tassaavoq Kalaallit Nunaanni pissutsinik takutitsineq. Filmimi isiginnaartsitsisut isiginnaartitsisartutut ilinniarsimasuunngillat, filmillu aningaasalersorneqarnera annikingaarmat allaat Hollywoodimi filmiliarineqartartuni ussassaarutitut trailer-iliarineqartartunik akikinnerulluni.
- Takutipparput Kalaallit Nunaanni filmiliatsialammik sanasoqarsinnaasoq, tamannalu nuannaarutigalugulu tulluusimaarutigaarput. Neriuutigaara iluatsilluartumik filmiliornerput nunami maani allat filmeliorusulernerannik kinguneqassasoq. Filmiliornermi unammillernartut annertusimapput, børnehjemmemilu meeqqat asseqanngitsunik misigisaqarsimapput. Pisussat tulliuttut aallaavigalugit takussavarput susoqassanersoq, filmini piukkunneqartuni kingullerni tallimaasuni ilanngutissanngikkutta nuanniilliortoqarnavianngilaq pakatsisoqarnaviarnanilu. Kisianni Uummannami neriuut suli pigaarput, Ann Andreasen naqissusiivoq.
