Uummannaq: Saarullinnik issimut panertitanik tunisassiuleruttortut

Uummannami aalisakkerivimmi pisortaq Kirsten Jensen aalisakkanik suliffeqarfissuup nittartagaanut oqaluttuarpoq saarulliit aappaagu apriilip qaammataata tungaanut panertinneqassasut.

Uummannami aalisakkerivik saarullinnik maskiinamik tisaanik tonsinik marlunnik Paamiuni tunisassiorfimmi sulianik siorna nassinneqarpoq. Saarulliit Uummannami assammik tisaneqartarmata Paamiuni maskiinamik tisaqqaarlugit nassiunneqarsimapput, taamaaliornikkut piffissamik sivikinnerusumik atuinissaq angujumallugu. 

Saarullinnik issimut panertitanik tunisassiat amerlineqarnissaat anguniagaavoq.

- Saarulliit Paamiuni maskiinamik tisaat suliareqqinniarneri ilimagisamiit pisariuneruvoq, maannakkulli saarulliit tamarmik panertitsivimmut nivinngarneqareerput. Maanna saarulliit Uummannami tunitsivimmi tunisat tisaneqarput. Decembarip qeqqata missaani panertitsivitta ulikkaarnissaa naatsorsuutigaara, Kirsten Jensen suliffeqarfissuup nittartagaanut taama oqarpoq.

Issimut panertitsinermi silaannaap panerlunilu nillertuunissaa pingaaruteqarpoq.

- Siusinaarluta aallartikkutta tunisassiatta pitsaassusaat ajorsisinnaavoq silaannap kiappallaarnera pissutigalugu. Saarulliit nivinngarneqaraangamik qerisarput, paneriartornerallu arriitsuararsuusarluni. Taamaammat saarulliit issimut panertitat pitsaasuussappata nakkutigilluarneqarnissaat pingaaruteqarpoq, Kirsten Jensen oqarpoq.

Uummannami Royal Greenlandip tunisassiorfiani tupissutinik aamma panertitsisoqartarpoq.