Uummannaq Manhattanip qeqqani

USA-mi illoqarfissuarmi New York-imi Uummannaq saqqumilaartinneqartussanngorpoq.
Allattoq Mads Pedersen
februaarip 22-at 2012 10:57

New York-ip ilaani Manhattanimi “Greenland Week”-imik taallugu ullut arlallit Uummannamut kalaallinullu tunngasunik sammisassaqartitsisoqassaaq. Uummannami filmiliaq “Inuk” takutinneqassaaq, Uummannaq pillugu oqaluttuartoqassaaq, Nunatsinnilu meeqqat ulluat pillugu sammisaqartitsisoqassalluni. Scandinavia House nittartakkamini taama allappoq.

Filmi “Inuk” Mike Magidsonimit 2010-mi suliarineqarsimasoq takutinneqassaaq. Filmi nukakkiaqqamut 16-nik ukiulinnut, angerlarsimaffiup avataanut inissitaasumut meeqqallu illuanut inissinneqarsimasumut tunngavoq.

Filmimi “Inuk”-mi  inuusuttut piniartumik ilalerlutik issittumi angalapput. Angalanermilu inersimasunngornermut ikaarsaariarput, inuunermilu pisimasunut qiviaqqittariaqarneq aamma aqqusaarpaat.

“The Tale of Uummannaq and Ajajajaja” Galya Morrelimit suliarineqarsimasoq aamma takutinneqassaaq.Tassani piviusulersaarummik naatsukullaliami, kiisalu assitigut Uummannap oqaluttuassartaa oqaluttuarineqassaaq.

Misigineqarsinnaasut paasisassarsiorfigineqarsinnaasullu ilagissavaat kalaallit nipilersugaat, pinnguaataat, oqaluttuaat eqqumiitsuliaallu. Taakku Galya Morrelimit Joel Spiegelmanillu aaqqissorneqarput.

Ilaqutariit meeqqatik ilagalugit periarfissaqassapput, kalaallit inooriaasaannik, kiisalu Nunatta avannaani inuunermik oqaluttuunneqarnissamut.

Aaqqissuussinerit ingerlanneqassapput ulluni, februarip 29-ani, kiisalu marsip aallaqqaataani pingajuanilu.