Uummannap sulluani angalasoqassanngitsoq

Politiit Uummannap sulluani nunap qaqqanit sisoorsinnaaneranut tamatumalu malitsigisaanik tassaartoqarsinnaaneranut suli aarlerisaarisut, politiit unnerluussisussaatitaasuata Tobias Bergip ilisimatitsissutigaa.

Nuugaatsiami tassaarsuaqarnerani inuit sisamat maannamut maqaasineqarput.

Sakkutuut imarsiortut aqqartartui sumiiffimmiikkaluarput, umiarsuarmilli alapernaarsuummi Vædderenimi naalagaq naapertorlugu qaqqap sisooqqissinnaanera pissutigalugu aqqartartut sulisinnaanngikkallarput.

AAMMA ATUARUK Nukannguup Nuugaatsiami tassaarsuaq imaaniit isiginnaarpaa

Politiit unnerluussisussaatitaasuata erseqqissaatigaa innuttaasut sapinngisamik qatsissumiissasut.

Politiit paasissutissanik nutaanik nalunaaruteqaqqippata radiukkut immikkut ittumik tusarliusseqqinnissatsinnut piareersimavugut.
Taamaattoq radioaviisip tullia nalunaaqutaq arfinermut aallakaatinneqassaaq.

AAMMA ATUARUK Unnuaq nuna sajunngilaq

AAMMA ATUARUK Tassaarsuarneranit eqqugaasut taperserneqarluartut