Uuliaarluarnermut Greenpeace malinnaavoq

Ullumi isumalluarnartumik tutsiuttoqaraluartoq suli nuannaarnissamut piffissaanngikkallarnerarpaa.

- Soorunami neriulluartoqarpoq. Taamaakkaluartorli inuit isumalluarpallaarnaveersaarput, aaqqissutaasormi qaqugorsuarmut atanavianngimmat uulialu 500 mio. literi suli Mexicop Kangerliumanersuata imartaaniimmat, Hanne Lyng Winther oqarpoq.

- Aalisarnermut tamaanilu immami uumasunut qanoq kinguneqarumaarnersoq nalunangaarmat eqqarsaataasinnaanngilarluunniit. Imarmi uuliap millionilikkutaanik literinik annertutigisup aniaffigisimavaa uulialu immami itisuumi uumasunut qanoq sunniuteqartarnersoq siornatigut paasineqarsimanngilaq.

- Uumasunulli inuussutissarsiornermullu ajorluinnartumik kinguneqartoq ukiunilu aggersuni suli ajornartorsiutaasarumaartoq kikkut tamarmik, soorlu ilisimatusartut, aalisartut tamaanimiullu, isumaqatigiissutigisinnaavaat.

- Ajornartorsiullu alla tassaavoq uuliamik arrorsaat, Corixit, 7 mio. literinik annertutigisoq uuliamik piiaaniarnermi atorneqarsimammat. Corixit toqunartuuvoq uulialu aamma toqunartuulluni, taakkua marluullutik uumasunut nerisaqatigiinnut, soorlu saanilunnut, eqalussuarnut arfernullu qanoq sunniuteqarumaarnersut ilisimaneqanngilluinnarpoq siornatigummi uuliaarluernerni atorneqarsimannginnami.

Tamanna qanoq sunniuteqarnersoq ukiuni tulliuttuni arlalinni misissugassaassaaq, Hanne Lyng Winther oqarpoq.