VIDEO Utoqqalinersiuteqalernissamut ukiut killigititat qaffanneqalerput
Ullumikkut 65-inik ukioqarluni suliunnaartoqartarpoq, naalakkersuisooqatigiillu utoqqalinersiuteqalernissap ukiumik ataatsimik qaffanneqarnissaanut isumassarsiaat, ukiut marluk qaangiuppata atuutsinneqalissaaq, 2021-milu 67-nik ukioqarluni utoqqalinersiaqartalissapput.
Ukioqqortusiartorpugut sulisinnaassuserpullu sivitsorluni.
Nuummi aqqusinermi naapitatta ilaata, utoqqalinersiuteqalernissamut ukiut killigititat qaffanneqarnerat iluarisimaarpaa.
- Ajorinngilara, inuit kingulliit inuuneqqortusiartormata, Alberthine Noahsen oqarpoq.
Nunani allani ineriartortoqarpoq Nunarpullu tamatumunnga malinnaavoq, taamaattumik aaqqissuusseqqinnissaq pisariaqartoq Aningaasaqarnermut siunnersuisooqatigiit isumaqarput.
- Utoqqaat sivisunermik inuusalerput, imaappoq aningaasarsiornikkut pilersueqataasinnaasut ikiliartorput.
- Aaqqissuusseqqinnermi tassaavoq inuiaqatigiit ataatsimut isigalugit qanoq atugaqarpat qanorlu atugaqartariaqarpat, Aningaasaqarnermut siunnersuisooqatigiinni siulittaasup tullia, Ulla Lynge, oqarpoq.
Immikkut timimut tarnimullu sakkortuumik oqimaatsumillu sulisimagaanni taava taakku 65-inik ukioqarlutik utoqqalinersiaqalersinnaasut, ilaqutariinnermut, naligiissitaanermut isumaginninnermullu naalakkersuisup, Martha Lund Olsenip, oqaatigaa.