Utaqqiisaasumik sanaartorneq Atuarfik Hans Lyngemi inissaqartitsilissasoq
Atuarfik Hans Lyngemi atuartuutitaqarnissaq piumaneqarluarpoq. Nuummiittunit amerlanernit tamanna ilisimaneqarpoq.
Kommuneqarfik Sermersuumi Sanarfinermut Avatangiisinullu Ingerlatsivik Qinngorpumi Brugsenip eqqaani atuarfiup akiani utaqqiisaasumik illorsualiorsinnaanersoq Aningaasaqarnermut ataatsimiititaliamit sisamanngornermi aalajangiiffigineqassaaq.
Inissanik amigaateqarneq
Illorsuaq nutaaq atuarfissanik miniklubimillu ullumikkut atuarfimmiittunik inissaqartitsissaaq, inissaaleqinermullu atuartut, ilinniartitsisut angajoqqaallu ullumikkut atuarfiusumi ajornartorsiutigisartagaannut iluarsiissutaanissaa siunertaavoq.
Sumiiffilli niuertarfinnut, inuussutissarsiuteqartunut namminersortunut kiisalu kommunillu pilersaarutaanit inissianut atorneqartussiaagaluarmat tamanna immikkut akuersissuteqarfigineqarnissaa pisariaqarpoq.
Aningaasaqarnermut ataatsimiititaliap sanarfinermut avatangiisinullu ingerlatsiviup pilersaarutaa akuerissappagu tamanna apriilip sisamaata kingorna kommunalbestyrelseulersussanut ingerlateqqinneqassaaq taakkunanngalu aalajangiiffigineqavissalluni.
Utaqqiisaarut
AHL-ip allilerneqarnissaanut pilersaarut sanarfinermut avatangiisinullu ataatsimiititaliamit siusinnerusukkut suliarineqareersimavoq, atuarfillu ukiuni qulini atuuttussatut utaqqiisaasumik illorsualiarineqassasoq inassutigineqarsimavoq.
