USA UNESCO-mit anisoq

USA-p oqaatigaa Unesco Israelimik assuarinnittuusoq, tamannalu tunuliaqutigalugu USA Unescomit anisoq.

USA-p Unescomi ilaasortaanani alaatsinaattutut inissisimalernissaa misiliutigineqarniartoq, USA-p nunanut allanut tunngasunut ministereqarfiata nalunaarutigaa.

USA-p Unescomi alaatsinaattutut misiliutitut inissisimalernermini isummersoqataasinnaanissani neriuutigaa, soorlu aamma immikkut ilisimasat pillugit Unescomik avitseqatigiissinnaanissani neriuutigigaa.

Unesco Israelimik assuarinnittuusoq USA-p aatsaat oqaatigilinngilaa. USA-p Unescomut aningaasaleeqataasarnini 2011-mili unitsippai, Unescommi Palæstina suleqatigiiffimmut taamanikkut ilaasortanngortimmagu.

USA-p Unescomit aninissaa USA-p nunanut allanut tunngasunut ministerianit Rex Tillersonimit aalajangerneqartoq, ministereqarfiup oqaaseqartitaata oqaatigaa.

Nunat immikkoortui eriagisassat Unescop allattorsimaffianiipput, Kalaallit Nunaanni nunap immikkoortui marluk eriagisassatut allattorsimaffimmut ilanngunneqarsimallutik, tassa Ilulissat Kangia Kujataanilu nunat immikkuualuttui tallimat Unescop allattorsimaffianut ilanngunneqarsimallutik.

USA-p Unescomit aninissaa 2018-imi decembarip ulluisa 31-ianni atuutilissasoq nalunaarutigineqarpoq.