USA Ruslanditulli umiarsuarnik sikunik aserorteruteqalerusuttoq

USA-mi senatorit marluk, tassa Lisa Murkowski Alaskameersoq, Maria Cantwellilu Washingtonimeersoq, sikunik aserorterutinik arfinilinnik sanatitsisoqarnissaa pillugu inatsisissatut siunnersuummik saqqummiussaqarput. Aviisi Alaska Dispatch taama allaaserisaqarpoq.

Ruslandip Issittumi suliniutinut tunngatillugu USA-mut naleqqiullugu siuaqqavallaarnera tikkuartorlugu taakku taama siunnersuuteqarput, soorlu aamma Kinap sikunik aserorterutinik sanatitsisimanera assersuutigigaat.

Issittup imartaata sikuata aakkiartornera pissutaalluni Issittup imartaani angallanneq annertusiartorpoq, tamannalu isumannaallisaaniarnermut annaassiniartarnermullu tunngatillugu pisussaaffiliivoq.

USA-mik sineriammik nakkutilliisut sikunik aserorterutinik atorfissaqartitsipput, illersornissaqarfillumi aamma taamaattunik atorfissaqartitsilluni. Naak inatsisissatut siunnersuut milliardilikkaanik aningaasartuuteqarnissamik kinguneqassagaluartoq tamanna pisariaqartinneqartoq, senatorit Murkowski Cantwellillu oqaatigaat.