USA: Pituffimmi kiffartuussinerup ukiut 1-3 qaangiuppata suliarimannittussarsiuuteqqinnissaa ilimanarpoq
Amerikamiut Pituffimmi sakkutooqarfianni kiffartuussineq aserfallatsaaliuinerlu tamaat ukiut pingasut qaangiuppata allanit isumagineqalersinnaassagunartoq, USA-p Københavnimi aallartitaqarfia ilisimatitsivoq.
- Sakkutooqarfiup (amerikamiut, aaqq.) Pituffimmi kiffartuussinissamik isumaqatigiissutip ukiup ataatsip pingasulluunniit iluanni suliariumannittussarsiuuteqqinneqarsinnaanissaa ilimagaa, amerikamiut Danmarkimi aallartitaqarfiata oqaaseqartartua KNR-imut taama oqarpoq.
Danskit nunanut allanut tunngasunut ministeriata Martin Lidegaardip Folketingimi isumasioqatigiissitsereersorlu amerikamiut taama nalunaarput. Ministerip isumasioqatigiinnerup kingorna oqaatigaa Danmarkip, Kalaallit Nunaata USA-llu isumaqatigiinniarnerat Exelis Services A/S-ip kiffartuussinissamik isumaqatigiissutaata sivikillineqarsinnaaneranik kinguneqarallartoq.
Aamma atuaruk Exelisip kiffartuussinissamik isumaqatigiissutaata sivikillisarneqarnissaa Lidegaardip sulissutigaa
Lidegaard naapertorlugu isumaqatigiissut ukiuni arfineq-marlunni atuuttuussaasoq 'ilutsinneqarsinnaassappat ukiumut ataatsimut sivikillineqarsinnaassasoq'. Tamannali USA-p, Kalaallit Nunaata Danmarkillu isumaqatigiinneriaqqinnerisa takutikkumaarpaat.
Inatsisit aporfiusut
Exelis Services A/S-imut isumaqatigiissutaasup atorunnaarsinneqaannarsinnaannginneranut amerikamiut suliariumannittussarsiuussinermut malittarisassaat pissutaapput.
- Suliap uannut saqqummiunneqarnera naapertussagukku, taava suliariumannittussarsiuussinermi piffissaliuunneqartup sivikilleqarnissaanut inatsisitigut periarfissaqarpoq. Sulisariumannittussarsiuussinerullu atorunnaarsinneqarallarnissaanut periarfissaqanngilaq. Taamaaliortoqassagaluarpat taarsiissuteqarnissamut akisussaatitsisoqassaaq, Martin Lidegaard.
Gavin Sundwallillu tamanna uppernarsarpaa:
- Amerikap tungaanit inatsisitigut periarfissaqanngilagut Exelis Services A/S-imut isumaqatigiissut piffissaq taanna angutinnagu (ukioq ataaseq pingasulluunniit) atorunnaarsissallugu, taamaammat isumaqatigiissut atorunnaarallartissinnaanngilarput. Oktobarimit suliariumannittussarsiuuteqqinneqarnissaata tungaanut isumaqatigiissut atuutissaaq.
Aamma atuaruk Nunanut allanut tunngasunut ministereqarfik atorfilittanik Pentagoniliartitsisoq
USA: Isumaqatigiissutaasut tamaasa malippagut
Amerikamiulli sakkutooqarfiata, suliariumannittussarsiuussisuusup, ukiaq suliariumannittussarsiuussisoqarmat Kalaallit Nunaannut/Danmarkimut isumaqatigiissutaasunik tamanik malinnissimanera USA-mit aalajangiusimaneqarpoq.
Tamannali Danmarkimi Kalaallit Nunaannilu assigiinngitsunik isumaqarfigineqarsimavoq.
- Uagut (USA, aaqq.) aallaqqaataaniilli Kalaallit Nunaannut isumaqatigiissutitta anersaava malillugu ingerlatsinissarput oqaatigaarput. Kalaallilli naalakkersuisuisa danskillu naalakkersuisuisa suliamut tunngatillugu allaanerusumik isiginninnerat nassuerutigaarput.
- Kukkussuteqarsimalluta oqaatigisinnaanngilarput, kunngeqarfimmulli Danmarkimut kalaallinullu atassuteqarnerput illersorumallugu tamanut naammaginartumik pitsaasumillu aaqqiissutissarsinissaq isumagerusupparput, Gavin Sundwall KNR-imut taama oqarpoq.
