PITUFFIK USA-p Pituffimmut tunngatillugu ilisimatitsissuteqarnera ministereqarfiup tusaanngitsoorsimagaa
Aviisi Jyllands-Posten ullumi taama allaaserisaqarpoq.
Aviisip nunanut allanut tunngasunut ministereqarfimmut allagaatinik takunnissinnaatitaanermik noqqaassuteqarneratigut paasinarsivoq, suliffeqarfiit Pituffimmi kiffartuussinissamik isumaqatigiissuteqarnissamut neqerooruteqartut sisamaasut - ilaatigut Exelis Services A/S - piginneqatigiiffittut allamit aqutatut naliliiffiginiarneqarnerini amerikamiut sakkutooqarfiat ministereqarfiup ikiorumasimanngikkaa.
AAMMA ATUARUK Qujaukitsoq: Aaqqiagiinnginneq malittarisassatigut aaqqinniassavarput
Nunanut allanut tunngasunut ministereqarfiup amerikamiut sakkutooqarfiannut e-mailikkut allagaqaataani ima allassimavoq:
- Inuussutissarsiutitigut pissutsit maani allaffeqarfimmi ilisimasaqqissaanngilagut, taamaattumillu suliffeqarfiit pineqartut suliffeqarfinnit nunani allaniittunit ilumut aqutaanersut isummerfigisinnaanngilarput, ministereqarfik taama allappoq.
Ministereqarfiup akisussaaffini qimarratigisimagaa
Piginneqatigiiffiit pillugit inatsisinut professori CBS-imeersoq, Søren Friis Hansen naapertorlugu, nunanut allanut ministereqarfiup akisussaaffeqarnini qimarratigisimavaa:
- Suliffeqarfiit pineqartut ilumut Danmarkimi angerlarsimaffeqartuunerat uppernarsarniarlugu amerikamiut ikioqqusimapput. Suliffeqarfiillu danskit inatsisaat naapertorlugit ingerlatsinerat taamaallaat danskit naalakkersuisuinit naliliiffigineqarsinnaavoq, professori taama oqarpoq.
Suliariumannittussarsiuussinerup oqaasertai, suliffeqarfiup Exelis Services A/S-ip amerikami suliffeqarfimmit aqutaasup suliariumannittussarsiuussinermi ajugaaneranik kinguneqartut, nunanut allanut ministereqarfiup akuerisimavai.
AAMMA ATUARUK Pituffimmi kiffartuussinissamik isumaqatigiissutip annaaneqarnera
Nunanut allanut tunngasunut ministerip isornartorsiuineq tunngavissaqannginnerarpaa
Paasissutissat nutaat saqqummiunneqartut Enhedslistenimit, Venstremit Dansk Folkepartiimiillu sakkortuumik isornartorsiorneqarput. Søren Espersen KNR-imut oqaatigaa Nunanut allanut tunngasunut ministereqarfik 'suliami matumani ajorluinnartumik inissisimasoq':
- USA-p suliap matuma eqqortumik ingerlanneqarnissaa sapinngisani tamaat sulissutigisimarpasippaa. Nunanullu allanut tunngasunut ministereqarfiup nuna, ikinngutigisarput, suliaq pillugu ikioqqulluni saaffiginnissutaanik itigartitsinera akuerineqarsinnaanngilluinnarpoq.
Nunanut allanut tunngasunut ministereqarfiup suliffeqarfiit kiffartuussinissamik isumaqatigiissummut neqerooruteqarniartut 2013-imi akuerai, danskit Kammeradvokatiata nalilermagu tamanna EU-p suliariumannittussarsiuussisarnermut malittarisassaanut kalluaasinnaasoq.
Nunanut allanut tunngasunut ministeri, Martin Lidegaard, aviisimut Jyllands-Postenimut mailikkut akissuteqarluni allappoq, Nunanut allanut ministereqarfiup oqartussaasutut piginnaaneqarfigisaminuinnaq oqaaseqaateqarsinnaanera aarlerinartoqartinnagu.
- Taamaammat mailikkut allaqatigiittoqarsimanera, ullumikkut aatsaat takusara, uanga tunginnit annerusumik iliuuseqarfigisariaqartutut isiginngilara, aviisimut taama oqarpoq.
