USA-p atomimik qaartartorsui Trumpip amerliniarai

- Pitsaalluinnassagaluarpoq. Kisianni nunap sunalluunniit atomimik qaartartoqannginnissaa aamma kissaatigaara, qaartartuuteqassappalli nunarsuarmi pitsaanerpaasariaqarput, Donald Trump, tuluit nutaarsiassaqartitsiviannit Reutersimit apersorneqartilluni oqarpoq.

USA-p nunanut allanut naleqqiullugu atomimik qaartartorsuaateqarnermi kinguarsimanerusoq taanna isumaqarpoq.

Rusland atomimik qaartartunik 7000-inik peqartoq, USA-lu 6800-nik peqartoq, suliniaqatigiiffiup Ploughshares Fundip oqaatigaa.

Donald Trumpip Reutersimit apersorneqartilluni EU aamma nersualaarpaa. EU-p aqutsisutut ingerlaannarnissaa, Trumpip kissaatigaa.

Trumpip EU pillugu oqaasii EU pillugu siusinnerusukkut oqaaserisarsimasaanut naapertuutinngillat, EU-mi isornartorsiorsimavaa, assersuutigalugulu Tuluit Nunaata EU-mit aninissaa pillugu taasineq, Brexitimik taaguuserneqarsimasoq, qineqqusaarnermini tapersersorlugu.

Trumpip præsidentitut ivertinneqarnermi kingorna Tuluit ministeriunerunerat Theresa May tikilluaqqungaarpaa, EU-lu kingorna aamma isornartorsiungaatsiarlugu.

Nigel Farage, Tuluit Nunaata EU-mi ilaasortaajunnaarnissaanik aamma ilungersuuteqartoq Trumpimut aamma tikeraaqqammerpoq.