USA-miut angisoorsuit unammisussanngorpaat

Argentina Chilemut ajuunnermik ataatsimik ajugaaqqarmat Nunarput assammik arsarluni nunarsuarmi pissartanngorniunnermut anngussinnaajunnaarpoq. Angutit kalaallit nunanut allanut unammisartut Argentinami amerikap nunavittaani unammersuarnerni maanna angusaqarluarnerpaani tallimani inissinniarsarilerput.
Assi © : Akutaaneq Kreutzmann/Minik Dahl Høegh
juunip 17-at 2016 16:17

Argentina Chilemut ajuunnermik ataatsimik ajugaaqqarmat Nunarput assammik arsarluni nunarsuarmi pissartanngorniunnermut anngussinnaajunnaarpoq.

Angutit kalaallit nunanut allanut unammisartut Argentinami amerikap nunavittaani unammersuarnerni maanna angusaqarluarnerpaani tallimani inissinniarsarilerput.

Tassanilu USA-miut 100 kilot tungaannut ilaat oqimaassusillit aqagu arfininngornermi unammisussanngorpaat.

Nunatta nunanut allanut unammisartui amerikap nunavittaani unammersuarnerni ajugaasussatut piukkunneqarnerpaanut Argentinamut ajugaammata nuannapput.

- Nuannertorujussuuvoq. Unamminerup aallartinnginneranili ajugaanissarput upperigatsigu, unamminerup ingerlanerani sukataaginnaavippugut. Naammassigatta soorunami eqqissiallattorujussuuvugut. Tamaavitta nuannaarluta immitsinnut eqippugut pississaarlutalu, assammik arsarluni nunanut allanut unammisartut ilaat Nuka Heilmann oqarpoq.

Anngunngitsoorneq

Kalaallit Nunaallu Guatemalamut 45-23-imik ajugaammat nunarsuarmi pissartanngorniunnermut suli anngussinnaagaluarpoq.

- Guatemalamut unammisissatsinnut piareersarluarpugut. Taamaammat nammineq arsarnerput aallupparput, taamaasillutalu ajugaaffigingaatsiarpagut, Nuka Heilmannip qatanngutaa Miki Heilmann oqarpoq.

Unnuarli ajalusoorpoq. Argentinap Chilemut unamminerani unamminerup naammassinissaanut sekundialuinnanngortullu Argentina ajuuppoq 22-21-imillu ajugaalluni. Taamaammallu Nunarput nunarsuarmi pissartanngorniunnermut anngussinnaajunnaarluni.

- Initsinni Mikilu marluulluta isiginnaarparput. Ilatta ilaasa hotelimi nerisarfitsinni TV-kkut isiginnaarpaat. Soorunami ingerlaqqinnissarput pillugu naligiinnissaat, imaluunniit Chilep ajugaanissaa neriuutigigaluarparput. Kisianni naggataatigut Argentina ajuukkami uggornartorujussuuvoq, Nuka Heilmann oqarpoq.

Argentina Chilelu naligiissimasuuppata, Nunarput Frankrigimi 2017-imi nunarsuarmi pissartanngorniunnermut anngussinnaagaluarpoq.

- Tamatta nikallungalluta unnuk unnuarlu atorparput, nunanut allanut unammisartut sungiusaasuat, Niels Møller oqarpoq, erseqqissaassutigalugulu Nunarput semifinalemut anngutingajattoq.

- Unamminermi takuneqarsinnaavoq, minuttit kingulliit marluk pingasulluunniit Chile pointinnangajattoq, taamaattoqarsimasuuppallu uagut ingerlaqqissagaluarpugut, Niels Møller oqarpoq.

100 kilot tungaannut oqimaassusillit

Nunarpullu angusaqarluarnerpaat tallimaniinniarsarisussanngorpoq, tamannalu sapaatip akunnerata naanerani pissaaq, USA-lu siulliullugu unammissallugu. Unamminissamullu tassunga piareersartoqalereertoq, Niels Møllerip oqaatigaa.

- Arsartartorujussuaqarpoq, arlallit 195 centimeteriupput 100 kilollu tungaannut oqimaassuseqarlutik, Niels Møller oqarpoq.

Nunarpullu taakkununnga ajugaappat, nunanut allanut unammisartut Mexicomut Puerto Ricomulluunniit unammissapput, angusaqarluarnerpaat tallimaanngorniarsarillutik.

- Anguniakkagullu maannamit iluatsissinnaagutsigit, taava arfinileriarluta unammisimassaagut ataaseriaannarlu ajorsarsimassalluta. Tamannalu angusaalluarpoq, Niels Møller oqarpoq.

Assammik arsartartut unamminerit naggataat sapaatip akunnerata naanerani aallartinnginnerini unammisartut ullumi qasuersaartinneqarput.