VIDEO USA-mi aviisit Clinton akioriilluni oqallinnermi ajugaatikkaat
USA-mi aviisit siuttuusut arlallit præsidentinngorniartut tv-kkut oqallinnerannik allaaserisaqarnerminni Hillary Clintonip piffissap ilarujussuani Donald Trumpimit ingerlalluarnerunera eqqaavaat.
- Clintonip sakkortuumik oqallattaarnerata Trump imminut illersulersippaa, The New York Timesip nittartagaani qulequttat ilaat taama oqaasertaqarpoq.
- Aallaqqaammut saammarsimaarsinnarlutik Donald J. Trump sakkortuunik pisuutitseqattaarlunilu Clintonip politikkikkut suliaqarsimanera oqaaseqarfigisalermagu oqallinneq nuannerpallaanngitsumut saappoq. Ilaatigut Islamisk Statip pilersimaneranut, suliffissaaleqisoqarneranut nunarsuarmullu siaruarnermut pisuutippaa, aamma USA nunatut qernertumik amilinnut ajorluinnartuunerarpaa nunalu unioqqutitsillutik nunasianiat ungusimaneqartutut taallugu, aviisi Hillary Clintonip præsidentinngorniarneranik tapersersuisutut imminut taasoq taama allappoq.
- Oqallinnerup immikkoortuata aappaani Clinton ingerlalluarneruvoq oqaatsitigullu akioriinnerup naajartornerani ilaatigut Trumpip arnat pillugit uissuumminartunik oqaaseqartarsimanera sammineqarmat Trumpimit ingerlalluarnerulluni.
Aviisi Washington Post allappoq, oqallittut timimikkut kiinarsornermikkullu pissusaat maluginiagassaanerusimasoq.
Aviisi allappoq Clintonip unammillertini oqaluleraangat arlaleriarluni qujungussutigiinnartaraa, oqallinnerlu pingasunik immikkoortortaqarsimasuuppat Clinton immikkoortuni marlunni ajugaasoq kingullermilu ajugaaqqatuttoq.
Amerikami politikkikkut alaatsinaattut arlallit oqaatigaat Trump ingasattajaarpallaaranilu siumut oqaatigineq ajornartutut pissusilersortoq, naak tamanna præsidentinngorniuunnermi siornatigut ingasattajaartarnini siumullu nalunanngereertarnini ilisarnaatigisimagaluaraa.
- TV-kkut oqallinnermi qanoq pissuseqarniarsariva? Akissut tassaavoq, pissuserisartakkani tamaasa atorpai, The Washington Post taama allaaserisaqarpoq.
Los Angeles Timesip præsidentinngorniuttut tv-kkut oqallinneranni siullermi Clinton aamma ajugaatippaa.
Tv-qarfiup konservativinik tapersersuisup Fox Newsip oqallinnermi aqutsisoq Lester Holt isornartorsiorpaa Clinton Trumpimut naleqqiullugu iluaqutissarsiorsimanerarlugu.
Aviisip USA tamakkerlugu saqqummersartup USA Todayip Clinton piffissap iluarujussuani ingerlalluartutut aamma allaaseraa, aammalu pissutsikkut allanngorartuuneq pillugu oqaloqatigiinneq eqqaallugu, Trumpip tweet pillugu uippallernera Clintonip eqqarsarnartupilussuartutut taammagu.
- Clintonimut naleqqiullunga imminut aqussinnaaneruvunga, Trump oqallinnermi oqarpoq, imalu aamma oqarluni:
- Imminut aqussinnaanera pitsaaqutima annersaraat.
Tamannalu itisileqquneqarpoq.
- Ajugaasartut pissusaannik pissuseqarpunga, Trump taama akivoq.
- Woo, OK, Clinton qularpasilluni akivoq.
/ritzau/
