USA-imi qaartartumeerisutut pasineqartoq tigusarineqarpoq

Angut USA-mi New Yorkip illoqarfittaata ilaani Chelseami arfininngormat qaartitsisoqarneranut attuumassuteqartutut pasillugu ujaarineqartoq, New Jerseymi politiit danskit nalunaaqutaat malillugu ualikkut tallimat missaani tigusaraat.

Angut 28-inik ukiulik Ahmad Khan Rahami, amerikamiuuvoq afghanistanimiunillu naggueqarluni.

Nunat assigiinngitsut nutaarsiassaqartitsivii naapertorlugit angut New Jerseymi Lindenimi tigusarineqarpoq, politiinillu maannakkut nakkutigineqarluni.

Angutip assii FBI-mit saqqummersinneqarneranit akunnialunnguit qaangiutiinnartut angut tigusarineqarpoq.

Qaartartumeerisoqarneranut angut qanoq attuumassuteqarnersoq erseqqinngilaq, atorfillillu marluk atersineqanngitsut naapertorlugit, amerikamiut misissueqqissaartartuisa New Yorkimi qaartartumeeraluni saassussisoqarnerani inuit arlallit peqataasimasoraat.

Kikkut qaartartumeereqataasimasinnaaneri suli ilisimaneqanngitsoq, tusarliisut ilanngullugu oqaatigaat.

Chelseami arfininngormat qaartitsisoqarnerani inuit 29-it ikilerneqarput. Ilagaat aserorterput savimerngillu silaannakkut teqqalallutik. The New York Times taama allaaserisaqarpoq.

Ritzau