ASSIT Uranisiornermut akerliussutsimik Københavnimi ullumi takutitsisoqassaaq

“Urani Naamik”. Politikerit, eqqumiitsuliortut avatangiisinillu illersuiniaqatigiiffinneersut tamanna qulequtaralugu Københavnimi Rådhuspladsimi ullumi nalunaaqutaq qulingiluanut akerliussutsimik takutitsiniarput illoqarfiillu pingaarnersaata aqquserngisigut ingerlaaqatigiissallutik.
juulip 31-at 2015 06:46
Nutserisoq Simon Uldum -

Avatangiisinik illersuiniaqatigiiffik NOAH - Friends of the Earth akerliussutsimik takutitsinermik aaqqissuisuuvoq.

Suliniaqatigiiffiup uranimik piiaanissaq akerleraa, isumaqarami Kalaallit Nunaanni avatangiisinut pinngortitamullu ajoqusiissasoq.

NOAH aamma isumaqarpoq Kuannersuarni uranimik piiaaniarneq danskit naalagaaffiannit toqqaannanngikkaluartumik tapersersorneqartoq, sullissiviit Aarhus Universitet, Dansk Institut for Internationale Studier aamma GEUS - tamarmik Kuannersuarni suliniummut peqataasut - danskit aningaasanut inatsisaannit aningaasalersugaammata.

Tamannalu suliniaqatigiiffiup NOAH-p 'assuarnartutut' isigaa.

AAMMA ATUARUK Uranisiornermut akerliussutsimik Københavnimi takutitsilersut

Akerliussutsimik takutitsineq ungasinngisaani ullumikkut aallartittussaq "Kalaallit Nunaat Tivolimi" nalerorlugu pissaaq. Taamaammat akerliussutsimik takutitsinissap peqataasoqarluarnissaa naatsorsuutigineqarpoq.

Ingerlaaqatigiinnerup kingorna Nytorvimi oqalugiartussat ilagaat Inuit Ataqatigiit tunuliaqutaralugit folketingimut ilaasortaq Aaja Chemnitz Larsen, Finn Sørensen Enhedslistenimeersoq aammalu Rasmus Nordqvist Alternativetimeersoq, ilaatigullu nipilersortartut Miké Thomsen aamma Nivi Nielsen akerliussutsimik takutitsisoqarnerani aliikkusersuissapput.