Uranisiorfissaq Narsarmiut avissaaqqassutigigaat

Kujataani innuttaasut akornanni uranisiorneq pillugu siullerpaamik isumasiuisoqarpoq - innuttaasullu apeqqut annertuumik avissaartuussutigigaat erserpoq.
Assi © : Ace & Ace / A Taste of Greenland
marsip 09-at 2015 05:45
Nutserisoq Simon Uldum -

Ilisimatuut marluk Aalborgimi Københavnimilu Universitetineersut nalunaarusiaat nutaaq, aviisip ullormut saqqummersartup Informationip ullumi allaaseraa.
 
Ilisimatuut taakku marluk piffissami sivisuumi Narsamiissimapput, Kuannersuillu uranisiorfinngorsinnaanerat pillugu innuttaasut oqaloqatigisimallugit.

AAMMA ATUARUK Savaatillit aatsitassarsiornissaq pillugu tikinneqarlutik paasitinneqarusuttut

Apersuinerillu takutippaat innuttaasut annertuumik avissaartuuteqqasut. Ilaat suliniut akuersaarpaat, piiaavillu Kujataanut nunamullu tamarmut iluaqutaasussatut isigalugu, suliffissanik isertitanillu pissarsiffigineqarsinnaassammat.
 
Allallu piiaaviup periarfissanik nutaanik tunniussisinnaanera takusinnaagaluarlugu avatangiisinut nalorninaateqarnera ernumanartoqartippaat uranisiornerullu suliffeqarfinnit nunanit allaneersunit Nunatsinnit piginneqataaffigineqanngitsunit sunniuteqaqataaffigineqanngitsunillu ingerlanneqarsinnaanera aarleralugu.
 
Misissuinermili uranisiornissaq pillugu Kujataani isumasiuinernik imaqanngilaq.

AAMMA ATUARUK GME-p Kuannersuarni 2017-mit sanaartorsinnaanissaq neriuutigaat

Aalborgip Universitetitani ilisimatooq Lill Rastad Bjørst aamma Københavnip Universitetitani inuiaqatigiit pissusiinik ilisimatooq Helene Ahrens Johansen nalunaarusiamik suliarinnittuupput.

Nalunaarusiaq ataani atuarneqarsinnaavoq (danskisuinnaq allaqqavoq):