Uranimik piiaaneq kalaallit kisimik oqartussaaffiginngilaat

Uranimik piiaaneq nunanullu allanut annissuineq kalaallit kisimik oqartussaaffiginngikkaat, naalagaaffeqatigiinneq pillugu immikkut ilisimasalik erseqqissaavoq.
Assi © : Anders Hviid
Allattoq Ritzau
oktobarip 06-at 2015 18:25
Nutserisoq Jens Thorin

- Kalaallit Nunaat nunanut allanut tunngasunik qanoq politikkeqassanerlutik namminerisaminnik aalajangersaasinnaanngillat. Tamatumani Danmmark aalajangiisuusumik oqartussaavoq, Lars Hovbakke Sørensen, nunat tamalaat akornanni pissutsit pillugit lektoriusoq oqarpoq.

Aamma atuaruk Uranip nunatsinneersup sakkussiornermut atorneqannginnissaa anguniarneqarpoq

Taanna aamma oqarpoq, kalaallit oqartussaqarfii pillugit, danskit naalakkersuisui inatsisissamik siunnersuuteqarnerat pisariaqanngikkaluartoq, tassami tunngaviusumik inatsimmi nammersornerlu pillugu inatsimmi erseqimmat, Kalaallit Nunaat nunanut allanut tunngassuneqartuni nammineerluni aalajangiisinnaassuseqanngitsoq.

- Oqaluuserisat suulluunniit nunanut allanut attaveqarnermut ilaasinnaanera minnerpaamilluunnit nalornissutigineqartillugu, Danmark aalajangiisartussaavoq. Uranilu pineqartillugu taamaattuusoq oqartariaqarpugut, lektori oqarpoq.

Lars Hovbakke Sørensen naliliivoq, Danmarkip nunani tamalaani pisussaaffimminik naammassinnissinnaaneranik ajornakusoortitsilertoq, Kalaallit Nunaata arlaannik iliuuseqannginnissaa, danskit naalakkersuisuisa inatsisissatut siunnersuuteqarnikkut qulakkeerusukkaat aamma oqarluni.

- Naalagaaffeqatigiit nunani tamalaani pisussaaffiliussaannut akerliusinnaasumik kalaallit iliuuseqarpata, tamanna Danmarkip akisussaaffigisussaavaa, Lars Hovbakke Sørensen naliliivoq.