URANI Urani pillugu inatsisit marluusut aappaat Folketingimi akuersissutigineqarpoq

Nunatsinni atomip nukinganik atortussianik piiaaneq tamatumalu nakkutigineqarnera pillugu inatsit Folketingimi, nunatsinni nalunaaqutaq malillugu, ullaaq manna akuersissutigineqarpoq.
Assi © : Simon Uldum
juunip 02-at 2016 07:24
Nutserisoq Simon Uldum -

99-it akuersipput qulillu itigartitsillutik.

Nunatsinni uranimik aatsitassanillu qinngornernik ulorianartunik akulinnik allanik tunisassiortoqarnissaanut aalajangersaaffiusumik inatsisit marluusut aappaat taamaalilluni akuersissutigineqarpoq.

Inatsisit aappaat uranip Nunatsinnit annissorneqartup nakkutigineqarneranut tunngassuteqarpoq, Folketingimilu tallimanngorpat ullaap tungaani akuersissutigineqarnissaa naatsorsuutigineqarluni.

Inatsisit pineqartut Inatsisartuni avissaartuussutaapput. Amerlanerussuteqartut, tassalu naalakkersuisooqatigiit, inatsisissatut siunnersuutit tapersersorpaat, Inuit Ataqatigiillu akerliullutik uranisiorneq pillugu innuttaasunik taasititsisoqarnissaa ilungersuutigisimallugu.

Aamma atuaruk Tunisisarnissamut siunnersuut danskit amerlanerussuteqarfigaat

Inuit Ataqatigiit aamma isumaqarput Danmarkip avammut nioqquteqarnissamut akuersissuteqartussaanera pillugu inatsisilioqartoqarneratigut aatsitassanut akisussaaffiup Nunatsinnut tamakkiisumik 2010-mi tunniunneqartup ilaa Danmarkimut utertinneqartoq.

Folketingimi partiini Enhedslisten kisiartaalluni Inuit Ataqatigiinnik tapersiilluni inatsisissatut siunnersuutinik itigartitsilluni taasivoq. SF aamma Alternativet uranisiortoqarnissaanut akerliullutik aamma nalunaaruteqarsimapput.

Partiilli taakku Namminersorlutik Oqartussat aamma Inatsisartuni amerlanerussuteqartut ataqqillugit urani pillugu inatsisissatut siunnersuutinut akuersillutik taasipput.

Inatsisissatut siunnersuutit ukioq manna juulip aallaqqaataani atuutilersinneqassapput.

Aamma atuaruk URANI Uranimik avammut nioqquteqarnissaq akuersissutigineqartoq

Aamma atuaruk Innuttaasunik taasititsisoqassanngilaq