Uran pillugu apeqqut Partii Naleqqami assigiinngitsunik isummerfiusoq
Naleqqap isumaa eqqortinneqassappat uranimut apeqqut naleqqap isumaanut naapertuutivinngilaq
Partiimik pilersitseqataasup Partiillu Naleqqap siulittaasuata tulliata Per Rosing-Petersenip uran pillugu innuttaasunik taasisitsinissaq politikkikkut sulinermi pigaarnerpaatippaa
- Partii avammut nalunaaqqaarnermininngaaniit tunngaviusoq tunngavigineqarpoq aamma allanngortinnavianngilarput tassalu innutaasut tusarniarneqarnissaat pingaaruteqarmat, Per Rosing-Petersen oqarpoq.
Innuttaasut peqataatinneqarnissaat siulittaasup tulliata pingaartikkamiuk, siulittaasup oqaaserisai AG-imi ipassaq saqqummiunneqartumi atuaramigit tupaallaatigai imatummi Hans Enoksen AG-imi issuarneqarpoq issuaaneq aallartippoq:
"Uranimut naaggaarluinnarsimaneq atorunnaarsinneqareernikuuvoq tamannalu tapersersorparput" issuaaneq naavoq.
Hans Enoksen aamma Per Rosing-Petersen AG-imi saqqummiunneqartunut isumaqagtigiinngillat.
Uran pillugu innutaasut taasitinneqarnissaat partiip politikkiani pingaaruteqartoq siulittaasoq tullialu isumaqatigiillutik oqarput .
- Apeqqut taanna pillugu innuttaasut isumaannik paasisaqarnissaq pingaaruteqarpoq,
apeqqut taama pingaaruteqartigisoq innuttaasut avaqqutiinnarlugit aalajangersaasoqarsinnaanngilaq, Partii Naleqqap siulittaasua Hans Enoksen KNR-imut taama oqarpoq.
Hans Enoksen aviisimut AG-imut oqaaserisimasani pillugit ima oqarpoq.
- Aviisiliortup taama oqarnini nammineq akisussaaffigissavaa, Hans Enoksen oqarpoq.
Taamaakkaluartoq partii Naleraq aviisimi AG-imi allaaserineqartumut naqqiissummik suli nassiussisimanngilaq, tassalu oqaatigisariaqarpoq, Partii Naleraq allanngorartunik nalunaaruteqartoq .
Partii Naleqqap politikikkut anguniagaani 14nik qupperneqartumi qupperaraanni paatsuunganeq mikinerulinngilaq. Uranimummi apeqqut ilanngunneqarsimanngilaq. Taannalu pillugu siulittaasup tullianut apeqqutigaarput.
- Partii Naleqqap politikkikkut anguniagaasa allatorneqarneranni anguniakkat tamakkerlutik allassimanngillat, uranimut tunngasortaa allassimanngilaq, uran allassimanngippat imaanngilaq Partii Naleraq uran pillugu politikkeqanngitsoq Per Rosing Petersen oqarpoq, - anguniakkat tamakkerlugit allanneqanngillat, partii Naleraq nutaajuvoq taamaattumik siulersuisuni aalajangersakkat tunngavigalugit apeqqutit tamakkua qaqittarpagut aamma uran pillugu taasisitsinissamut tunngasoq taamaappoq,
Partii Naleqqami siulittaasup tullia Per Rosing-Petersen oqarpoq.
Hans Enoksenip apersorneqarnermini oqaasii allanngortinneqanngitsut, Aviisip AG-ip KNR-imut aalajangiusimagaa.
Uranimut tunngasumik taasisitsisoqaratarnissaa pillugu Partii Naleqqap qinigassanngortitaasa ilaannut Radioaviisimiit sianeqattaaratta, ilaat taamaaliorusupput ilaallu taamaaliorusunnatik.