Avatangiisit

Upernavimmi puttasoqannginnera ilungersunartoq

Upernaviup umiarsualiviani puttasoqannginnera aalisartunut piniartunullu ajornartorsiutaavoq. Tamannalu sillimaniarnermut pitsaanngitsoq, innuttaasut isumaqarput. Aaqqiisoqalersorli Qaasuitsup Kommunia neriorsuivoq.

Allattoq Sara K. Jakobsen

novembarip 15-at 2016 10:24

Tulakkuit majuartarfitsigut saviminertigut aserfallassimasutigut meterinik marlunnik majuaqqaassaatit. Pisannik, nerisassanik pisattanilluunniit nassataqaruit, talivit illuinnaa atussavat.

Upernaviup umiarsualiviani puttasoqanngilaq. Pissutsillu taamaannerat aalisartunut minnerunngitsumillu meeqqanut, utoqqarnut takornarianullu misinnartuusarpoq.

- Majuarniaraanni eqaattuusariaqarpoq, peqqissuullunilu inuusuttuusariaqarpoq, Upernavimmi angallataatilik Jan Kleinschmidt oqarpoq.

Umiarsualivik ulapaarfiusoq siorna septembarimili puttasoqanngilaq, puttasoq mallertarneranik qaanngumillu aserfallasimammat.

Aamma atuaruk Ilulissani takornarianut pissutsit naleqqutinngitsut

- Aalisartut piniartullu ullormut niooragassaqartuaannarput, taamaammat atorfissaqartittarparput. Kisianni uaguinnaanngitsoq, atuisunit tamanit amigaatigineqartarpoq, umiatsiaararsorlutik aalisartut peqatigiiffianni siulittaasup tullia Lars Petersen oqarpoq.

Nunniukkamut malinnut illersuusiamut aamma tulalluni niusoqarsinnaavoq.
Taannali aamma isumannaatsuunngilaq, Jan Kleinschmidt oqarpoq.

- Quaattoqarluni nakkartoqarsinnaavoq. Qerrualuillu akornannut maaguni niuujartoqarsinnaavoq, taliiartoqarsinnaavoq arlaannilluunniit pisoqarsinnaavoq.

Tamannalu takornarianut aarlerititsisinnaavoq.

- Ajuusaarnarpoq. Upernavimmi niusoqarsinnaanngitsoq, avammut oqaatigineqartassasoq ilimagaara. Taava takornariat maangarumajunnaassapput, Jan Kleinschmidt oqarpoq.

Upernaviup puttasussaanik nutaanik tikisitsisoqalersoq, Qaasuitsup Kommunianiit oqaatigaat. Sikuerpallu taanna aqqarneqassasoq, avatangiisinut teknikeqarnermullu immikkoortortaqarfimmiit neriorsuipput.