Upernavimmi atuartut inissaaleqinerat akuersaarnartinneqanngitsoq
Upernavimmi atuartut inissaaleqinerat akuersaarneqarsinnaanngilaq, ilinniartitsisut kattuffiata siulittaasua Sivso Dorph oqarpoq.
Upernaviup nunaqarfiineersut atuartut Upernavimmi atuarnerminnik pinngitsooratik ukiaru atuarneq aallarteqqippat nangitsisussat 22-it Upernavimmi kollegiami inissaqanngillat, kollegia ulikkaarmat.
Upernaviup nunaqarfiineersut Upernavimmut ukiaru pinngitsooratik 10. klasseriartussat 22-it saniatigut nunaqarfinneersut katillutik 91-it kollegiami inissamik aamma utaqqipput. Upernaviup borgmesteria Jens Immanuelsen oqarpoq, atuarfiup ukiut tamaasa saaffiginnittarneratulli namminneq Namminersornerullutik Oqartussanut ukiut tamaasa aamma qinnuteqartarsimallutik.
-Ukiut sisamat kingulliit eqqarsaatigissagaani kommunalbestyrelsep ukiumut tullermut aningaasartuutissaminik suliaqarnermini Namminersornerullutik Oqartussanut sanaartugassatut kissaateqarnerinut ilaasarpoq, kollegiap mikivallaarneratigut atualersussat ilaannakortut tiguneqartariaqartarmata. Maannakkullu aamma taamaappoq ukiaru atualersussat eqqarsaatigalugit. Taamaattumik tamannakipiluttunartorujussuuvoq , Jens Immanuelsen oqarpoq.
Atuarfiup saaffiginnittarneri naapertorlugit Namminersornerullutik Oqartussanut kommune tamatigut qinnuteqartarnerarpaa.
-Kisianni pisussaaffik sanaartornermullu aningaasaliinissaq Inatsisartuniippoq. Taamaattumik neriunnaqaaq Naalakkersuisunut saaffiginnissutigisartakkagut siunissaq ungasinerusoq eqqarsaatigalugu Inatsisartutigoortumik aaqqiivigineqassasut.
Jens Immanuelsen oqarpoq upernaaru kommunalbestyrelse ataatsimiilerpat tamanna eqqartorneqarumaartoq, aammali Inatsisartut kultureqarnermut Ilinniartitaanermullu Ataatsimiititaliaa ataatsimiilerpat tamanna eqqartorneqassasoq ilisimanerarpaa.
- Juunip ingerlanerani Ataatsimiititaliaq Upernavimmut tikippat tamanna qaqeqqinniarparput, aaqqilertorneqassappat Inatsisartut pisussaammata.
-Upernavimmi atuartoqarnikkut pissutsit massakkut atuuttut ilinniartitsisut kattuffianit IMAK-imit akuersaarneqarsinnaangillat, IMAK-ip siulittaasua Sivso Dorph taama oqarpoq.
- Isumaqarpugut ajornartorsiuterujussuusoq aamma erloqinartorujussuusoq. Atuarfimmi peqqussut malillugu, atuartut nunaqarfimminni atuartinneqarsinnaanngitsut, kollegianik neqeroorfigineqartussaapput, sumiluunniit.
Sivso Dorph isumaqarpoq nunatsinni ilinniagaqartunik taama amerlatigisunik amigaateqartilluta ajornartorsiut piaartumik aaqqivigineqartariaqartoq.
- Kommunit Namminersornerullutillu Oqartussat pisussaaffeqarput ajornartorsiummik qaangiiniarnissamut aningaasanik nassaarniassallutik.
Ilinniartitaanermut Naalakkersuisoq Henriette Rasmussen Upernavimmi atuarfiup ineqarfiutaanut atatillugu pisunik suli tusagaqarsimannginnerartoq oqaaseqarusunngikkallarpoq, oqarlunili pissusissamisoorsorinngikkini suliap taamaattup tusagassiuutit aqqutigalugit suliarineqarnissaa.
