Upernavimmi atuartut ineqarfiat mikivallaaqaaq
Upernavimmi atuartut ineqarfiat mikivallaarmat Upernaviup nunaqarfiineersut atuartut katillutik 91-it, ukiaru atuarneq aallarteqqippat Upernavimmut atuarnerminnik nangitsiartorsinnaanngillat, Upernavimmi kollegia 48-iinnarnut inissaqarmat. Upernaviup atuarfiani pisortap tullia Karoline Rosing oqarpoq Upernavimmi atuartoqarnikkut pissutsit massakkut inissisimanerat kipiluttunartoq.
- Atuarfimmi ineqarfiuterput mikivallaalersimavoq, ukiuni arlalinni 48-iinnarnut inissiaangami. Ukiut qulingajaat matuma siornatigut noqqaassutigingaluarparput nutaamik inissialiortoqaqqullugu, ulloq mannali tikillugu tusagaqarsimannginnatta pakatsissutigisarparput.
Atuartut nunaqarfinneersut ukiaru atuariartortussat inissaqanngivissut oqarpoq.
- 9. klassit, nunaqarfinni ilinniartitsisutut ilinniarsimanngitsunik ilinniartitsisulinneersut pinngitsoorata tigusussaangatsigit, taakku siullinneqassapput.
Nunaqarfinneersut meeqqat 30-it Upernavimmut aamma 10.klasseriartortussaapput.
- Inissaqanngillat. Taakkunannga arfineq pingasut inissaqarput sinneri ingerlaqqikkusukkaluarlutik inissaqaratik. Taakku saniatigut allat ingerlaqqikkusukkaluit aamma inissaqanngivipput. Taamaattumik ataatsimut isigalugu 91-it ingerlaqqissinnaangaluarput inissaqarunik, Karoline Rosing oqarpoq.
Upernavimmi atuarfik kommunemut ukiut tamaasa ajornartorsiut pillugu allagaqartarsimangaluarpoq, suli kinguneqanngitsumik.
-Tupiguutigisarparput qisuariartoqarneq ajormat ingammik Naalakkersuisut tungaanniik.
Atuartut nunaqarfimmiit 10.klasseriartussat angajoqqaarsiassarsiuunneqaraluarput, nunaqarfimmiit sisamaannaat angajoqaassassiorsimallutik.
- Qanoq iliuuseqarfigissanerpagut. Ajuusaarnartupilussuuvoq taamatut sullissisuulluni inissaqartitsinani, Karoline Rosing oqarpoq.
Upernaviup avataani kommuneqarfinni allani inissarsiorsinnaaneq periarfissaangaluarpoq. Kanukokap ineqartitsisarnermi akissatut aalajangiussai naapertorlugit atuartumik ataatsimik illoqarfigisap avataanut inissiineq ukiumut 100.000-it sinnerlugit akeqartarpoq. Upernaviup kommuneqarfia katillugit ukiumut 4. mio. kronet sinnerlugit akiliisarnissamut akissaqarunnanngitsoq Karoline Rosingip oqaatigaa.
Ajornartorsiut pinngitsoorani atuartunut kingunerluuteqassanerarpaa:
- Upernavimmi suliffissaaleqisut amerlisussaassapput. Massakkut Naalakkersuisut oqartarput ilinniarniaritsi kisiannilu inissaqartitsisaratik.
Upernavimmi Kommunalbestyrelsemi borgmesterip tulliata aappaa Siumumeersoq Ole Thorleifsen, Inatsisartuni kultureqarnermut Ataatsimiititaliami aamma ilaasortaasoq allappoq Upernavimmi kollegiap mikivallaarnera Namminersornerullutik Oqartussanut ukiorpaalunngortuni tikkuarneqartarsimagaluartoq maannamut kinguneqanngitsumik. Taamaattumik aappaagumut aningaasanut inatsissap piareersarneqarnerani Kultureqarnermut naalakkersuisoq piaartumik iliuuseqartariaqalersoq Ole Thorleifsen oqarpoq.
