KNR Upernaaq manna tv-kkut nangeqattaartunik assigiinngitsunik marlunnik aallakaatitsisalerniarluni KNR-ip pilersaarutigaa
Aallakaatinneqartartussap aappaani periutsit nutaarluinnaat atorneqassapput, tassami kommuunit sisamaasut peqatigalugit atuarfinni atuartut angajulliit nunaqarfitsik pillugu aallakaatitassioqqullugit kajumissaarneqassammata. Nunaqarfigisami inuunerup ingerlanerata aallakaatitassiarinissaanut nunaqarfimmiut asseqanngitsumik periarfissinneqassapput. Aallakaatitatigut nunaqarfimmi inuuneq tamanut takusassiarineqassaaq. Nunaqarfimmi inuunerup qanoq ingerlaneranik malinnaanissaminnut nunatsinni najugaqartut matumuunakkut periarfissinneqassapput.
”Kalaallit Nunatta immikkuullarissutaasa ilagaat nunap anginerujussua aammalu immikkoorutitut taaneqarsinnaavoq sineriarujussuarmi nunaqarfiit mikinerit anginerilluunniit siammarsimallutik inissisimanerat. Kalaallit Nunaata kitaani, kangiani, kujataani kiisalu avannaani inuunermi atugassarititaasut assigiinngeqaat. Taamaakkaluartoq sumiluunniit inoqarfiit ingerlalluartut nassaassaapput,” taama oqarpoq KNR-ip pisortaa Søren Lennert Mortensen imatullu nangippoq: ”KNR-ip Kalaallit Nunaanni innuttaasut tamaasa sullitassarai, kisiannili aningaasanut tunngasut pissutsit nassuiarluarneqarsinnaasut aallaavigalugit Kalaallit Nunaanni annertunerusumik angalaarnissamut periarfissaqanngilagut. Ilisimaneqartutuut aningaasassaaleqineq pissutigalugu KNR nunaqarfinnut angalassalluni annertunerusumik periarfissaqanngilaq, nunaqarfinnilu najugaqartut annertunerusumik KNR-mit attavigineqarsinnaaneq ajorput.
Kalaallit Nunaanni najugaqarninni nunaqarfiit illoqarfiillu amerlanersaat tikissimavakka. Nammineq takusakka naapertorlugit pissutsit assigiinnginerujussuat paasereersimavara. Massakkulli kalaallit tamarmik nunaqarfinnut tunngatillugu paasisaqarnerulernissaminnut periarfissinneqassapput.
Atortorissaarutit aallakaatitassiornermut atugassat assigiinngitsut marluk KNR-ip pisiarissavai. Atortorissaarutit taakkua sumulluunniit angallanneqarsinnaassapput. Atorissaarutit ilagissavaat assiliivik, mikrofoni isiginnaagassiornermilu atortorissaarutit allat. Nunaqarfinni atuarfinnut atortorissaarutit ilitsersuutitalerlugit nassiunneqartassapput. Taamaasilluni atuartut aallakaatitassioriaatsimik nutaamik suliaqarnissaminnik periarfissaqalissapput.
”Neriuutigaarput nunaqarfinni amerlasuuni KNR-ip neqeroorutaa ilassilluarneqassasoq. Neriuutigaarputtaaq aallakaatitat piviusulersaarutit naatsut 40-50-llu akornanni amerlassuseqartut naammassineqarsinnaassasut. Aallakaatitatigut nunaqarfinni inuuneq ullumikkorpiaq qanoq innersoq takutinniarneqassaaq. Nunaqarfinnut nunaqarfimmiunullu isiginnittaatsip naqissuseereernikup millisarnissaa aammalu nunaqarfiit annertunerusumik ilisarineqalernissaat suliniuteqarnitsigut siunertaraarput. Siunissami nunaqarfiit pillugit oqallinnerup piviusunik tunngaveqarnissaanut aallakaatitassiaasartussat tapertaanissaat aammattaaq neriuutigaarput.” Taamatut Søren Lennert Mortensen naggasiivoq.
Matumani suliniummi KNR-imi atorfilik Niels Pavia Lynge aqutsisuussaaq. Namminersorluni Oqartussanit aammalu kommuuninit KNR-ip suliniutaa ajunngitsumik ilassilluarneqarpoq.
Air Greenland aamma qutsavigaarput, tassami taakkua atortorissaarutissatta nunaqarfinnut angallannerat akeqanngitsumik isumagissammassuk aammalu Kanukokap tapiineranut atortunik assartorneranut.
Kalaallit Nunaanni igariaatsit assigiinngitsut pillugit tv-kkut aallakaatitsisarnissat
Kalaallit Nunaanni igariaatsit soqutiginartut assigiinngitsuusullu nassaassaapput. Igariaatsit qangali atorsimasat assigiinngitsuusulli atorneqartarput, kiisalu iganermi najoqqutassat immaqa siulerisanit kingornunneqarsimasut aamma atorneqartarlutik. Kisiannili aamma nutaaliorneq atorlugu igasoqartarpoq. Igariaatsit nunani allaneersut ilikkarsimavagut atortarlugillu, aammalumi ilikkakkagut malillugit iganermi akoorisinnaasarpugut periutsit assigiinngitsut atorlugit.
Igaassagullumi nunatta pissarititai imaannaanngitsuupput pitsaalluinnarlutillu soorlu makkua: Aalisakkat, timmissat, neqit assigiinngitsut nunamilu naasut naatitallu. Iganeq pillugu aallakaatitani ilaatigut kalaalimerngit pitsaasut peqqinnartullu atorneqassapput aallaavigineqarlutillu.
”TV-kkut iganermut tunngatillugu aallakaatitat aqqaneq marluussapput: Pingasut Ilulissaniit, pingasut Sisimiuniit, pingasut Nuummiit kiisalu pingasut Qaqortumiit. Illoqarfinni taakkunani pissarititaasut malitassiallu igasunit pikkorissunit nerisassiarineqassapput,” taama oqarpoq KNR-imi kulturilerinermik aaqqissuisoq Henriette Rasmussen, imatullu nangippoq:” Aallakaatitsinernut taakkununnga atatillugu naakkaluartumik illoqarfiit aallakaatitsiffiusut ilisaritinneqassapput, soorunalumi nerisassiortuusussat kiinnat nutaat ilisaritinneqassallutik.”
Aallakaatitassat siulliit arfinillit piareeqqapput iluarsaanneqariaannaallutik. Tullissaasa arfinillit piareersarnerat aallartereerpoq.
”Peqqissuunissaq aammalu piujuartitsinerup siuarsarnissaa anguniarneqarpoq. Nerisassat pissanganartut, assit kusanartut, igasut iggarissut kiisalu igaassat pitsaalluinnartut tamatumani qitiussapput,” taama Henriette Rasmussen naggasiivoq.