Upalungaarsimasussat Qalasersuup piumasaqaatigineqarnerani iluaqutiginiaraat
Upalungaarsimasussat Danmarkimi Kalaallit Nunaannilu ujarassiuutut misissuisoqarfiup, GEUS-ip, ataaniitinneqassaaq Kunngeqarfiullu nunaviup toqqaviata ataneranik Naalagaaffiit Peqatigiinnut piumasaqaateqarneranut ilaatinneqassallutik.
Nunatta, Savalimmiut Danmarkillu peqatigiillutik Nunatta Savalimmiullu eqqaanni sumiiffiit tallimat piumasaqaatigisimavaat, sumiiffiillu pineqartut ilisimatuunit ujarassiuutut misissuinerit naapertorlugit Kunngeqarfimmit Danmarkimit pigineqartussatut naliliiffigineqarsimapput.
GEUS-imi pisortap tullia, Flemming Getreuer Christiansen, taama oqaluttuarpoq.
- Sulineq nutaaq aallartinneqarpoq, paasissutissallu pissarsiarineqartut isumannaarniarneqassapput. Paasissutissat nutaat suliamut ilanngunneqarnissaat qulaakkeerniarneqassaaq nunanilu allani qanoq pisoqarnera aamma malittarineqassalluni.
Paasissutissat pissarsiariuminarnerulersinneqassasut
Piumasaqaatillu Naalagaaffiit Peqatigiinnut tunniunneqareeraluartut, paasissutissat piumasaqaateqarnermi tunngavigineqartut ingerlaavartumik nutarteriffigineqarnissaat pisariaqarpoq.
AAMMA ATUARUK Ruslandip issittumi imartat isumaqatigiinniutigerusukkai
Ujarassiuut ilisimatuullu Issittoq pillugu pullaviat allanngorartuarpoq, taamaammat angusat sukumiinerusut amerlanerusullu pissarsiarineqarsinnaassapput.
Kunngeqarfiullu Danmarkip piumasaqaatai Naalagaaffiit Peqatigiinnit nalilersuiffigineqalerpata taakku tunngavilersuutigineqassapput.
- Upalungaarsimasussat aqqutigalugit Nunaviup toqqaviata atanera pillugu ataatsimiititaliarsuarmik oqaloqateqarnermi isumaqatigiinniarnermilunniit paasissutissat ullumikkumit pitsaanerusut pigineqarsinnaassapput. Piumasaqaatigineqartut tunngavilersuutigineqartullu pitsaanerussapput, Flemming Getreuer Christiansen taama oqarpoq.
Upalungaarsimasussat ukiuni 10-15-ini atuunnissaat, tassalu Kunngeqarfiup Naalagaaffiit Peqatigiinnut isumaqatigiinniarnerata naammassinissaata tungaanut atuunnissaat, Flemming Getreuer Christiansenip naatsorsuutigaa.