Unnugu Sisimiuni qineqqusaassapput
Kommuninngortussat nutaat pillugit qinersisartut annerusumik unnugu tusagaqarsinnaassapput aamma politikerit siunissami takorluugaat ilanngullugit, tassami KNR-TV radiolu unnugu qineqqusaartunik toqqaannartumik aallakaatitseqqissammata, tamatumuuna Sisimiuninngaanniit.
Allattoq Louise M. Kleemann
marsip 27-at 2008 07:08
Marlunngormat qinersisartunik ataatsimiititsineq, nuna tamakkerlugu aallakaatinneqartoq siulleq, Ilulissaniit aallakaatinneqarpoq. Qineqqusaarnerup kingorna siunissamut takorluukkat amigaataanerarlugit politikerillu neriorsuutaat qanoq aningaasalersorniarneqarnersut amigaataanerarlugit isornartorsiorneqarput.
Ilaatigut taama isummersorpoq inuiaqatigiinni oqallissaarisartoq Juaaka Lyberth, tv-kkut qineqqusaartut marlunngormat malinnaaffigereerlugit.
Qinersisartut Qeqqata kommunissaani qinigassanngortittut qineqqusaarutaat unnugu tusarsinnaassavaat.
Toqqaannartumik kalaallisut aallakaatitsineq unnugu arfineq pingasunut aallartissaaq qallunaatullu 22.45 aallartissalluni.
Qineqqusaarneq tv-kkut radiukkullu toqqaannartumik aallakaatinneqassaaq.
