NALILIINEQ Unnuap taarnerpaaffiani ullorissat tallimat

Inuit arfineq marluulluta filmip ”Unnuap taarnerpaaffiani” immikkut takutitsinermi isiginnaariarparput. Filmertarferujussuarmi popcorniuserluta sodavandiuserlutalu, tassami filmeriaraanni tamakku ilaasarmata, immitsinnut ungasikujulluta marlukkaapajaarlutali issaavugut filmilu isiginnaalerlugu.
novembarip 19-at 2014 16:32

Minik Hansilu meeraallutilli kammagiipput. Ullut ilaanni Hansip malugilerpaa Minik nikallungasoq. Minik qiimmassarniarlugu Hansip siunnersuutigaa arlaannik nutaamik pissanganartumillu misigisassarsiussasut. Hansi isumassaaruteriarami siunnersuutigaa illumi aliortorfiusartumi unnuissasut. Misilillugulu uppernarsiniarpaat aliortukkat ilumoornersut, filmiliaralugillu. Minik akunnattuunngiivilluni akuersivoq, sivitsunngitsorlu illumi aliortorfiusartumiilereerput. Eqqumiitsunik pisoqaqattaaleriasaarpoq, sunalu tamarmi ilumoornersoq nalunarsilluni.

 

1 time 35 minutsilu qaangiummata filmi naavoq siulliuniutingajallutalu aniartorpugut taartoq qimallugu qaamanerusumut anillakkiartorluta.

 

Tumit produktionimit siullermik ersinartumik filmiliamik saqqummertoqareernikuuvoq, unalu Tumit produktionimit filmiliaq ersinartoq, torrallallugu ersinartunut nunanit allaneersunit isiginnaartakkatsinnut eqqaanarluni, immikkuullarequteqarlunili kalaallit ersinartulersaariaatsiannik imaqarmat.

 

Ersinarlunilu illarnartortaqarpoq, tupannartoqarlunilu. Inuusuttut ersinartunik isiginnaarusuttunut assut tulluarluni.

Ullorissat arfinillit tunniunneqarsinnaasut akornanni tallimanik ulloriannappoq.

 

Arfinillinik ulloriannassasuuppat aallartinnerani nipilersuut tunuliaqutaasussaq nipikinnerussagaluarpoq, nipituallaalaarmat inuttaasut oqaluttut tusaajuminaalaarsinnaagamik. Allallu torrallannerusinnaasut pillugit tallimaannarnik ulloriannappoq. Taamaakkaluartorli ersinartunik isiginnaarusukkaangama misigerusuttakkakka misigigakkit, assut torrallatatut nalilerpara.

 

Tumit Produktionip ersinartuliaa ”Unnuap taarnerpaaffiani” Nuummi Katuami novembarip 21-aniit decembarip sisamaanut isiginnaariarneqarsinnaassaaq, Ilulissanilu novembarip 21-aniit 26-anut isiginnaariarneqarsinaassalluni, Sisimiunilu novembarip 27-aniit decembarip arfineq pingajuat ilanngullugu isiginnaariarneqarsinnaalluni.

 

Ersilluarisi.