Unioqqutitsisumik aalisartoqarnera unitseqqugaat
Aqutsiveqarfik Qeqertarsuup Tunuani umiatsiaararsortunut aggustimut qaleralittassiissutigineqartut aggustip 14-ianni nungupput, ulloq taanna killigalugu qaleralinniarneq unitsinneqarpoq. Qaleralinniarnerup unitsinneqarnerani umiatsiaararsortut 370-it pineqarput.
Unioqqutitsillutik aalisartut arlallit naammattoorneqarsimapput
Ilulissani piniarnermut nakkutilliisup umiatsiaararsortut 13-it unioqqutitsillutik ningittakkaminnik amualeruttortut naammattoorpai.
Tamannalu pissutigalugu Aalisarnermut piniarnermut Nunalerinermullu Naalakkersuisoq Finn Karlsen qisuariarpoq aalisarnermullu kattuffiit kaammattorlugit ilaasortaminnut unioqqutitsisumik aalisarneq unitseqqussagaat, tamanna akuersaarneqarsinnaanngilluinnarmat unioqqutitsisumillu tunisisut pillagassanngortinniarlugit suliassanngortinneqarsinnaammata.
Ilanngullugu erseqqissaatigaa unioqqutitsisumik tunineqartut EU-mut tunineqartussatut akuerineqarsinnaassanngimmata.
Sumiiffinni aalajangersimasumi misileraalluni aalisartoarsinnaavoq
Aqutsiveqarfimmi Qeqertarsuup tunuani aalajangersimasuni umiatsiaararsortut misileraallutik qaleralinniarsinnaatitaapput.
Umiatsiaararsortut aalisarsinnaanermut akuersissutaatillit Ilulissani, Qeqertarsuarmi, Qasigiannguani, Aasianni aamma Kangaatsiami najugaqartut misileraallutik qaleralinniarsinnaapput.
Misileraalluni qaleralittassiissutigineqartut katillutik 500 tonsiupput, 250 tonsit juulimi aalisarneqarsinnaapput aamma taama amerlatigisut aggustimi aalisarneqarsinnaallutik.
Umiatsiaararsorluni qaleralinniarneq 421 tonsinik qaammammut pisassiissutilerlugu septembarip aallaqqaataani aallarteqqinneqassaaq. Septembarip aallaqqaataa sioqqullugu aalisartoqarsinnaanngilaq, taamatullu aalisarnermi atortut septembarip aallaqqaataa nallertinnagu atoqqusaanatik.
Aalisarnermut Naalakkersuisoqarfik tunitsivinnut kajumissaarivoq tunineqartunut sukannersumik nakkutiginneqqusilluni.