Unicef: Afrikami meeqqat 1 millionit kaannersuaqarneranik eqqugaasinnaapput
Manerassuarmimi kiattup sarfarsuata El Niñop sakkortuup pinngoriartornera pissutaalluni Afrikami aamma panersuaqarpoq, kiattummi sarfarsua El Niño ukioq manna pinngortoq ukiut 50-it kingulliit ingerlaneranni aatsaat taama sakkortutigaaq.
Naalagaaffiit Peqatigiit meeqqanut suliniaqatigiiffiat Unicef taama nalunaaruteqarpoq.
Etiopiami ikiorsiisoqarsinnaanissaa pillugu 580 millionit koruunit missaannik, Angolamullu 173 millionit koruuninik, Somaliamullu 100 millionit koruunit missaannik katersisoqarsinnaanissaa Unicefip maanna taamaammat neriuutigaa.
- Naalakkersuisut assigiinngitsut sapinngisartik aallaavigalugu qisuariartarput, maannali pisut allarluinnaapput, siornatigummi taama pisoqarnikuunngilaq, meeqqallu annaanneqassagunik maannangaaq iliuuseqartoqartariaqarpoq, Unicefip Afrikami nunap immikkoortuani aqutsisua oqarpoq.
Tamaani meeqqat imermik nerisassanillu amigaateqarput, imermillu pilersuineq nerisassallu akitsoriartuinnavipput, ilaqutariillu nerisassanut akissaqarniarlutik pigisaminnik tuniniaasariaqalerput. Majsip Malawimi akia assersuutigalugu nalinginnaasumit 73 procentinik akisunerulersimavoq.
Lesotho, Zimbawe Sydafrikallu annertunersaa panernersuaqarfiulersinnaasutut aamma aarleqqutigineqarput, inuillu 18 millionit nerisassanik Etiopiami ikiorserneqartariaqalernissaat ernummatigineqarpoq.
/ritzau/
