Unammisartut ataqatigiilluarneq ajugaanermik kinguneqartoq
Colombia arfininngormat ajorsartinneqarpoq, Paraguay sapaatiummat tulliulluni ajorsartinneqarluni Uruguayimullu unammineq pissannganarluinnartoq isertitsinernik marlunnik siuaqqanermik aamma ajugaaffigineqarpoq.
Kalaallit nunaminniitsillutik Nuummi Inussivimmi, Pan Am-imi unamminermi ajugaasaqattaaginnavipput.
Nunanut allanut unammisartunut sungiusaasup Ingi Olsenip unammisartut eqqarsartaasiinik samminnissimaneq maanna iluaqutaalluarsoraa.
- Ukiuni kingullerni inup tamakkerlugu isiginissaa pingaatsipparput, tassa qanoq ittuunissat inissaqartinneqarput. Ajuallajaallisalaarnikuuvugut taavalu tamatta iluarusuttarnissarput inissaqartipparput.
AAMMA ATUARUK Ajugaaneq misigissuseqartitseqisoq
Tamannalu unammisartuni angusarissaarumallutik ilungersortariaqarsimagaluartuni malugineqarsinnaavoq:
- Unammisartut qiimasorujussuupput, naallu sapaatini akunnerni pingasuni ilagiiginnavikkaluarluta qatsussisoqanngilaq. Unammisartut imminnut mianersuullutillu paareqatigiipput, nunanut allanut unammisartut sungiusaasuat oqarpoq.
Kinguarsimasup, Miki Heilmannip ataasinngornermi unnukkut isertitsineq kingulleq unamminermi pissannganartumi inerniliisoq isertippaa, kalaallillu unamminerni nalingiingajaffiusumik ajugaatillugit.
Kalaallit unammisartut gruppiminni unamminissat marluk suli amigaatigaat. Brasiliameersut pingasunngorpat unammissavaat Canadameersullu sisamanngorpat unnukkut unammissallugit. Unamminerit tamarmik KNR tv-kkut malinnaavigisinnaavatit.
