Unammineq aalajangiisoq KNR-TV-kkuussaaq

FC Malamuk aamma Eqaluk 54 semifinalemut anngunniullutik unammissapput angutit arsaallutik pissartanngorniunneranni. Angusat takukkit.
Allattoq Noah Mølgaard
aggustip 08-at 2012 19:55

Isertitsinerit tamarmik pingaaruteqassapput unamminerit aalajangiisut Ilulissani ingerlanneqalerpata. Suli pulje 2 ajugaasussarsinngilaq. Nagdlúnguak Ilulissaneersoq aamma B-67 Nuummeersoq tassani naligiipput B-67-ilu aalajangiisumik Nagtoralimmut Paamiuneersumut sisamanngornermi unammissaaq. B-67 ajugaassappat isertitat kisinneqassapput puljemi ajugaasup nassaariniarnerani. Nagdlúnguak semifinalemut aamma anngutereerpoq.

Unammineq aamma aalajangiilluinnartoq pulje 1-mi pissaaq FC Malamuk aamma Eqaluk 54 nalunaaqutaq 18.00 unammilerpata. TV-mi isiginnaartut toqqaannartumik malinnaaffigisinnaavaat kikkut semifinalemut anngunnerat. Tassani ajugaasoq semifinalemut anngutissaaq naligiissappattali isertitat kiseqqaarneqassapput.

Pingasunngornermi angusat:
Kugsak 45 – Nagtoralik 4-2
Eqaluk 54 – SAK 3-2
Nagdlúnguak – ATA 6-0
G-44 – FC Malamuk 2-0

Sisamanngornermi unamminissat:
Nal. 14.00 UB-83 – SAK
Nal. 16.00 B-67 – Nagtoralik
Nal. 18.00 Eqaluk 54 – FC Malamuk (KNR-TV-mi toqqaannartoq)
Nal. 20.00 Kugsak 45 – ATA (KNR-TV-mi toqqaannartoq)