Umiatsiaqarnissamik piumasaqaat avoqqaarineqartoq
Inuusuttummi imaluunniit aalisartuusimasut arlaannik pissuteqarlutik aalisarunnaarsimasut akuersissummik qinnuteqartaraluarlutik umiatsiaaraqannginnertik aalisarnermullu atortunik pigisaqannginnertik pissutigalugu itigaartinneqartarsimapput:
- Kisiannili ilaasortagut, uanga assersuutigeqattaartarpara ernera, meeraaneraniilli peqatigiuagara maannamut, nammineq umiatsiamik pigisaqanngilaq uanga umiatsiaqarama. Aamma ukiuunerani qimussimik snescooterinillu uanga nammineq pigisannik peqatigiuaannarpara. Soorlu tamakkuninnga peqanngimmata, Timothæus Petersen, Kullorsuarmi Aalisartut Piniartullu Peqatigiiffianni siulittaasup tullia oqarpoq.
Timothæus Petersenip qaleralinniarsinnaanermut akuersissummik piniaraanni pinngitsoorani umiatsiaaraqarnissaq aalisarnermullu atortussaateqarnissaq avannaani sikusartumut tulluanngitsoq isumaqarpoq:
- Soorlu sikusartumiittut immaqa annerusumik eqqarsaatigineqarpallaanngillat ukiuunerani umiatsiamik aalisartoqarsinnaanngimmat januaariminngaanniit maaji, juuniluunniit tikillugu. Tamakkua isumaqarpunga naleqqussarneqartariaqartut, aammalu inatsit piffinnut assigiinngitsunut naleqqussaavigineqarluni immaqa aatsaat aaqqissuuteqqinneqarsinnaangaluarpoq, Timothæus Petersen oqarpoq.
Taamaammat Timothæus Peterseni inuusuttunut aalisartunngorusuttunut allanullu aalisarnermiit tunuarallarsimallutik aalisarnermik inuussutissarsiuteqalerusuttunut sikusartumiittunullu piumasaqaataasut aaqqiivigineqartariaqartut isumaqarpoq:
- Soorunami oqarutta immaqa Ilulissakkunnut naleqquppoq, taanna piumasaqaat. Kisiani Ilulissaninngaanniit avannarparterutta piumasaqaat equjartuaartussaavoq ukiuunerani eqqarsaatigineqanngillat qimussimik aalisartartut. Taamaattumik naleqquppallaanngilaq aamma immaqa inatsisip taassuma iluani malitseqartitsinerit allanik oqaateqatigiinnik ilanngunneqarsimasariaqaraluit ilanngunneqarsimanngillat, Timothæus Petersen oqarpoq.
