Umiarsuit nakkutilliissutit orpeqarput
Danmarkip sakkutuuisa nunatsinniittut juulli qallunaatut nalliussisarpaat. Umiarsuarni nakkutilliissutini aamma orpeqartarput.
Qimussimik alapernaarsuisut novembarip aallaqqaataanili angalasut tuperni illuaqqanilu sinittarlutik suliartik ingerlappaat. Taamatut angalaneq ilungersuanarsinnaavoq qamutit ulikkaarlutik usisut ullormut kilometererpassuit ingerlasiaqartarmata.
- Siriusimi sulisut kiilunik arlalinni oqilisinnaasarput Kalaallit Nunaanni qimussimik angalagaangamik, sakkutuut nittartakkaminni allapput.
Issittumi sakkortooqarfik aamma imarsiortunik sulisoqarpoq umiarsuarni nakkutilliissuniittunik. Umiarsuaq Hvidbjørnen ukiormanna Qaqortumi juullisiorpoq umiarsuarlu Triton Savalimmiuni Storøya-mi juullisiorluni.
Umiarsuaq nakkutilliissut Ejnar Mikkelsen maanna Nuummiippoq umiarsuaararlu Tulugaq Aasianniilluni.
- Umiarsuarni juulli ileqquusut ilisimaneqartut malillugit pisarpoq nerisassallu suussanersut sumiiffimmi sunik peqarnerata aalajangertarpaa. Kisianni amerlanertigut tassaagajuttarput qallunaat juullikkuni nerisannaavi, Issittumi sakkortooqarfik KNR.gl-mut taama ilisimatitsivoq.