Umiarsuit Kinameersut Sullualukkoornerusalernissaat Kinamit kaammattuutigineqarpoq
Sullualuup Manerassuup Atlantikullu akornanni immakkut angallanermi atorneqarnerulernissaa kaammattuutigineqarpoq, umiarsuit piffissaq sivikinnerusoq atorlugu sumiiffimmit sumiiffimmut anngussinnaalerniassammata, Kinami naalagaaffiup aviisia taama allaaserisaqartoq The Japan Timesip aamma allaaseraa.
Kina, Issittumi annertusiartuinnartumik sunniuteqaleriartorpoq, assersuutigalugu Kalaallit Nunaanni aatsitassarsiornermut uuliasiornermullu akuuleraluttuinnarluni, Islandimillu niueqateqarnerulernissamik isumaqatigiissusioqqammerluni. Nunat pissaanilissuartut inissisimaleraluttuinnartut Kina aamma India, Issittumi Siunnersuisoqatigiinni alaatsinaattutut inissisimalernissaat 2013-imi akuerineqarpoq.
Amerikap nunavittaa avannaqqullugu aqqut, Sullualuk, pillugu ilitsersuut 356-inik quppernilik, sukumiisorujussuarlu, Immakkut angallannermi Kinami isumannaallisaaniaqatigiit qaammatip massuma ingerlanerani saqqummiuppaat, aviisi China Daily taama allaaserisaqarpoq:
- Aqqut pineqartoq aaqqissugaanerusumik angallavigineqalerpat immakkut assartuineq allanngorujussuassaaq, nunat tamalaat akornanni niueqatigiinnermut sunniuteqarluassalluni, Liu Pengfei, Kinap Angallannermut ministereqarfianeersoq oqarpoq.