Umiarsuit Issittumi uuliamik kinertumik atuivallaarunnaartut

Norgemiittumi Tromsømi siorna Arctic Frontiersimi ataatsimeersuartoqartillugu isumaqatissarsiorneq aallartinneqarpoq. Kingorna ingerlatsiviit 65-it, suliniaqatigiiffiit allallu suliniuteqartut Issittumi uuliamik kinertumik atuinertik annikillisissimangaat Clean Arctic Alliance nalunaarpoq.

AAMMA ATUARUK Uuliap kinertup inerteqqutigineqarnissaa naalakkersuisooqataasut taperseraat

Uuliamik kinertumik atuisarneq ukiuni kingullerni eqiingaffigineqalersimavoq, taannami uumasunut sikumullu ajorluinnartumik sunniisarpoq, uuliammi taama ittup tappiorannattut svovlimik akullit imaanut aniatsittarpai.

Assersuutigalugu Danmarks Rederiforeningip Naalagaaffiit Peqatigiit imarsiortunut suliniaqatigiiffia IMO kajumissaarsimavaa nunarsuarmi tamarmi uuliamik kinertumik atuineq inerteqqutinngorteqqullugu. 2011-mi IMO'p uuliamik kinertumik atuineq Sikuiuitsumi kujallermi inerteqqutaalersippaa.

Ingerlatseqatigiiffiit uuliamik kinertumik atuisarunnaartut ilagaat Hurtigruten, taanna Norgep Kalaallit Nunaatalu sineriaani angallassisartuuvoq.

- Issittup imartaani ukiuni 125-ni angalasareerluta uulia taanna atorunnaarniarlugu aalajangerpugut. Tamaanimi mingutsitseqqinnissaq akuerineqarsinnaanngilaq, Hurtigrutenimi pisortaq Daniel Skjeldam Clean Arctic Alliance naapertorlugu taama oqarsimavoq.

AAMMA ATUARUK Illersornissaqarfiup issittumi suliniutai naammagisimaarneqartut