Umiarsuaq ikkarlittoq nioqqutissanik amigaateqartitsissaaq
KNI ukiormanna Royal Arctic Line assartuisoralugu nioqqutissanik pissarsiniartarnermini nangiteqattaarpoq. Siullermik umiarsuaq kraniiarpoq, umiarsuarmillu nutaamik attartortoqarpoq kraneqanngitsumik. Kingullertullu umiarsuaq pajuttoq Nuummiit 12 sømilinik avasitsigisumi ikkarlippoq.
- Tamatuma kinguneranik nioqqutissat nutaat Uummannamut Upernavimmullu ingerlasussat kinguaattuussaapput. Tamatuma kingunerissavaattaaq nioqqutissat tunineqarsinnaanerannut killiliusssaq qaangiutiaassasoq. Tamanna uagut annaasaqaatigissavarput. Inuimmi italiensk salat sapaatip akunnera kingulleq pissarsiarisinnaasimaganagu pisarnermit pisinerunavianngillat. Nioqqutissat umiarsuarmiittut tassaapput immiaaqqat, imeruersaatit, nerisassaanngitsut aammalu nassiussat ulorianartut Nuummiit nassiussat, KNI-mi pisiniarnermut takoqqusaarinermullu pisortaq Kurt Lauritsen oqarpoq.
KNIp avannaanut nassiussaasa saniatigut nioqqutissat Danmarkimeersut aamma umiarsuarmiipput. Taakku sorpiaaneri Kurt Lauritsenip oqaatigisinnaanngilaa containerit imai tamakkerlugit suli ilisimaneqanngimmata.
- Sapaatip akunnera 35-mi inuuissiornermik taallugu nioqquteqassamaarpugut. Umiarsuaq Vega Sagittarius ikkarlimmat inuuissiornermi nioqqutissat angumersisinnaajunnaarput. Kisianni inuuissiorluni niuerneq avannaani sivitsorumaarparput nioqqutissat apuuteriarpata. Naatsumik oqaatigalugu umiarsuup ikkarlinnerata eqqornerluppaatigut pisisartutsinnullu tamanna assut ajuusaarutigaarput, Kurt Lauritsen oqarpoq.
Avannaamiulli utaqqivallaassanngillat. Tassami sapaatip akunnera tulleq nioqqutissat Danmarkimiit Uummannamut Upernavimmullu ingerlanneqassapput tamannalu naammasineqarluarumaartoq Royal Arctic Line neriorsuivoq.
- Umiarsuaq ikkarlittoq qaqugu kaanngassanersoq suli naluarput nioqqutissallu tassaniittut qaqugu apuunnissaat aatsaat paasinarsiumaarpoq umiarsuup qanoq pinissaa nalunarunnaarpat. Vega Sagittariusip taartissaanik umiarsuarmik attartorpugut taamaasilluta sineriammut assartuinermi umiarsuit pingasunngoqqinniassammata. Assut paasiuminaappoq umiarsuaq qanoq ililluni ikkarlissinnaanersoq. Nassuiaatissat ilagisinnaavaat nunatsinni angalanermik misilittagakitsut inuttaanerat. Qujanartumik politiit ilisimatippaatigut ikkarlinnermi aalakoortoqarsimanngitsoq, Royal Arctic Line-mi sullissinermi pisortaq Lars Borris Pedersen oqarpoq.
