Umiarsualivissuaq ullumi atoqqaartinneqassaaq

Nuummi umiarsualivittaassaaq ajornartorsiuteqarfiusimaqaaq. Arlaleriarluni kinguaattoorfiuvoq, naatsorsuutillu kingulliit marluk amigartooruteqarfiupput.
Assi © : SIKUKI
septembarip 22-at 2017 06:51
Nutserisoq Simon Uldum -

Umiarsualiviulli sanaartorneqarnera aggustip qaammataani naammassivoq, qaammatinik qulinik kinguaattoorfiulluni. Ullumilu, tallimanngornermi, umiarsualivissuaq atoqqaartinneqassaaq.
 
Naalakkersuisut siulittaasuat, Kim Kielsen, ullumi atoqqaartitsisoqarnerani peqataassaaq, tassungalu atatillugu ima oqarpoq:
 
- Umiarsualiviup nutaap atulerneratigut umiarsuit anginerusut tulassinnaalissapput. Nutaamik umiarsualivittaarnitsigut inuiaqatigiittut ineriartornitsinni pingaarutilimmik ikaarsaariarnissatsinni toqqammavissaqalerpugut, Kim Kielsen taama oqarpoq.

AAMMA ATUARUK Sikuki Nuuk Harbour naammassineqarpoq

AAMMA ATUARUK Nuummi umiarsualivittaassaq aasaru aatsaat naammassineqassaaq

Umiarsualiviorneq arlaleriarluni kinguaattoorfiuvoq. Siorna ukiakkut oqaatigineqarpoq umiarsualivik pilersaarutigineqartutut 2016-imi novembarimi naammassineqarani 2017-imi februaarip qaammataani aatsaat naammassineqassasoq. Ukiukkulli silarluttarnera pissutigalugu naammassineqarnissaa ukioq manna ukiamut kinguartinneqartariaqarsimavoq.
 
Kinguaattoorneq umiarsualivimmik piginnittup, Sikuki Harbour A/S-ip, sanaartortullu, Per Aarleff Grønland ApS-ip, akornanni akerleriissutigineqalerpoq.

AAMMA ATUARUK Umiarsualiviup saqitsaassutaanera eqqartuussivimmi aalajangiiffigineqassaaq

Qaammatini ilassutaasuni sulianut kina akiliisussanngortinneqassanersoq illuatungeriit isumaqatigiinngissutigaat, tamannalu isumaqatigiissitsiniarnikkut eqqartuussivimmi aalajangiiffigineqassaaq.