Umiarsualiorfik annanniarsarivoq
Tysklandimi naalakkersuisut aamma nunapilaani Mechlenburg-Vorpommern-imi naalakkersuisut tapiissuteqartarnerminnik unitsitsimmata umiarsualiorfik aningaasarlioreersoq suli ajornartorsiornerulerpoq. Uniinnarnissaq aqqutissatuaasutut isigineqaleraluarpoq. Umiarsualiorfimmi pisortanngorlaaq suli tunniutiinnanngilaq. Annaateriarnissaanut pilersaarusiorsimavoq maannalu sullitatik isumaqatigiinniarfigaat umiarsualiorfiup annaateriarnissaani peqataasinnaanersut.
Umiarsualiorfiup ittuata maanna misilippaa umiarsualiortitsisut akiligassatik siusinnerusukkut akilersinnaaneraat apersuutigalugu. Immikkut akiligassiisoqarnianngilaq taamaattoq siusinnerusukkut akiliinissaq siunertaavoq.
Ikaartaatinik ingerlatsisoq Scanlines ikaartaatinik marlunnik maanna sanatitsivoq taakkulu nalunaarput annaasseriarnissamut pilersaarut soqutiginartoqartillugu. Sullinneqartorli alla qallunaat umiarsuaatileqarfissuaq DFDS suli nalunaanngilaq annaasseriarnissamut peqataasinnaanerluni.
Tysklandimi naalakkersuisut imarsiornermut ataqatigiissaarisuat Hans-Joachim Otto neriunneqarpoq umiarsuarliorfiup sullitaasa allatigullu pilersuinikkut suleqataasa umiarsualiorfiup annaateriarnissaa peqataaffigerusussagaat. Tamannami iluatsinngippat umiarsualiorfissuup siunissaa pitsaavallaanngilaq naak suliakkiissutit 1 milliard euronik nalillit suliarisussaagaluarlugit.
'P und S Werften'-ip aningaasanik tigoriaannaateqannginneq ajornartorsiussutigaa.
Royal Arctic Linemi paasissutissiinermut pisortaq Jakob Strøm ilisimatitsivoq tyskit umiarsualiorfiata annaateriarnissaa pillugu suli attavigineqarsimanatik.
- Umiarsualiorfimmiut oqaloqatiginngilagut, kisianni uani sullitaasuni mikinernut ilaavugut taamaammat ilimanarneruvoq DFDS aamma Scanlines isummereerpata aperineqarnissarput. Uatsinnut pingaarneruvoq umiarsuit piffissaq eqqorlugu tunniunneqarnissaat aammalu pitsaasseq akilu eqqortut atorlugit tunniunneqarnissaat. Tamakku malinneqarsinnaappata ilimagisinnaalluarpara umiarsualiorfiup annaateriarnissaanut peqataasinnaanissarput, Jakob Strøm KNR.gl-mut oqarpoq.
