Qulaarpaa Ullut unnuallu tallimat Kalaallit Nunaannik aalassatsitsisut
Tallimanngorneq nal. 22.08: Inatsisartut Kukkunersiuinermut Ataatsimiititaliaa tusagassiorfinnut nalunaaruteqarniariartoq suna tamarmi isamippoq. Naalakkersuisut siulittaasuat Aleqa Hammond Namminersorlutik Oqartussat aningaasaataannik kr. 106.000-inik namminersuutigalugu atuisimavoq. Akiligassat ukiup aappaa avillugu amerliartuaarusaarsimapput aatsaallu tallimariarluni akileeqqusissutip eqqaasitsissutigineqarnerata kingornatigut akilersimavai. Naalakkersuisut siulittaasorisimasaat Kuupik Kleist kr. 25.000-inik aamma akiligassaqarsimavoq, tamatuma nalaani suli akilersimanngisaminik. Naalakkersuisoqarfinni allani aamma taamaaliortoqarsimanersoq paasiniarlugu Kukkunersiuinermut Ataatsimiititaliap kukkunersiuisut Deloitte misissueqqullugu qinnuigaa.
Arfininngorneq 27.september nal. 18.30: Aleqa Hammond tusagassiortunik katersortitsivoq. Pisimasunut tunngatillugu akisussaaffimmik tigusinerarpoq, Naalakkersuisutulli tunuarniuteqarniarnani kiisalu qinersinissamik suaarutiginnikkumanngilaq. Pisimasut tunngavigalugit kinguneqartitsiumanngilaq, Kukkunersiuinermut Ataatsimiititaliaatalu misissuisitsinerata inernera utaqqimaarumavaa.
Sapaat: Partiit akornanni ulapputtunnguaqarpoq. Naalakkersuisut Inatsisartuni Siumup Atassutillu gruppianit tapersersortissarsiorlutik sullipput.
Ataasinngorneq: Isornartorsiutit Inatsisartunullu qinersinissamik piumasaqaatit amerliartuinnarput. Kuupik Kleist Inatsisartuni ilaasortaanerminit tunuarluni nalunaaruteqarpoq, Namminersorlutik Oqartussat aningaasaataannik namminersuutigalugu atuisimanini tunuarnerminut peqqutaanerarpaa. Aleqa Hammondimut piumasaqaatit Kuupik Kleistip tunuarneratigut sakkortusipput.
Aleqa Hammond Kukkunersiuinermut Ataatsimiititaliap isumaliutissiissutaata naammassinissaata tungaanut Naalakkersuisut siulittaasuatut sulinngiffeqarniarluni nalunaaruteqarpoq.
Marlunngorneq: Inatsisartut Ukiakkut Ataatsimiinnerat aallartippoq. Qinikkat oqaluffimmit Inatsisartut ataatsimiittarfiata tungaanut ingerlaaqatigiinneranni akerliussutsimik takutitsisoqarpoq. Akerliussutsimik takutitsisut qinersisoqarnissaanik piumasaqarput, akerliussutsimillu takutitsisut saammaassisinnaanerannik pasinartoqanngillat.
Partii Naleraq Naalakkersuisut siulittaasuannut tatiginnikkunnaarluni nalunaaruteqarpoq. Aleqa Hammond taasisitsisoqarmat 15-14-imik ajugaavoq.
Amerlanerussuteqartut taakkorpiaat Aleqa Hammondip sulinngiffeqarnissaanik akuersipput. Kim Kielsen Naalakkersuisunut siulittaasuugallartussatut toqqarneqarpoq.
Partiip naalakkersuisooqatigiinnik suli tapersersuisuunera Atassutip siulittaasortaavata Knud Kristiansenip Qanoruumut naqissuserpaa.
Pingasunngorneq: Jens-Erik Kirkegaard (S) aamma Nick Nielsen (S) Naalakkersuisutut tunuarput. Atassut naalakkersuisooqatigiinnit tunuarpoq, naalakkersuisuutitaalu tunuarlutik.
Aleqa Hammond Siumup siulittaasuatut tunuarpoq.
Inatsisartunut qinersisitsinissamik suaarutiginnittoqareersorlu ulloq naavoq.
01.oktoberi pillugu pisut sukumiisumik oqaluttuarineqarnerat uani atuarsinnaavatit:
Aamma atuaruk Nalunaaquttap akunnikkaartumik: Naalakkersuisut isasoormata
KNR-TV-p oqalliffik Qulaarpaa kalaallisut qallunaatullu sisamanngorpat unnukkut kalaallisut qallunaatullu aallakaatissavai. Politikkikkut pissutsit ilungersunarsinerannut suna peqqutaanersoq qinikkat aperissavavut. Qulaarpaa kalaallisut nal. 19.30 aamma qallunaatut nal. 20.30 aallakaatissapput.
