Ulluinnarni atukkat ajornerulersinngikkaluarlugit sipaarutissat nassaariniarpai

Naalakkersuinikkut aquttut innutaasullu akornanni oqaloqatigiinnerit Kuupik Kleistip naalakkersuisut siulitaasuattut sulileruni suliassamisut pingaarnertut aallartinniarpai.
Allattoq Jaaku Lyberth
juunip 04-at 2009 15:48

Naalakkersuisoqarfiit inatsisartullu akornanni oqaloqatigiinnerit aallartinissaat pisariaqartoq Kuupik Kleist oqarpoq.

Meeqqat inuusuttuaqqallu atugaat pillugit nalunaarusiat arlallit piffissami kingullermi saqqummiunneqartartut aallaavigalugit, meeqqanik inuusuttuaqqanillu sullissisut tusarniarneqassapput suliassat aallartinneqartussat suuneri paasiniarneqassammata.

Allaffissornikkut aningaasartuutit sipaarfigineqarsinnaanerat misisuiffigineqassaaq nunatta karsiata amigartoorutasa nalimmassarneqarnissaat anguniarlugu. Nunatta karsia 2007-imiit 2009 tikillugu 877,5 milioner koruuninik amigartooruteqarpoq. Marloqiusamik kiffartuussinerit, akisussaaffiit ersarinnerusumik agguarneqarnissaat, allaffissornermilu aningaasartuutit misissuiffigineqarnissaat Kuupik Kleist naalakkersuisut siulittaasuattut sulileruni suliassamisut pingaarnertut suliassaralugit oqarpoq, taamatullu oqarnermini erseqqissarlugu innutaasut ulluinarni inuunerat ajorseriassanngitsoq oqaatigalugu.

Inuit Ataqatigiit siulersuisui inatsisartunilu ilaasortat arfininngorpat ataatsimiissapput, naalakkersuisooqateqarnissamik isumaqatigiinniarnerni tunngavissat aalajangiiffigineqassammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq