Ullorissat nunarsuatsinnut assingusut arfineq-marluk nassaarineqartut
Ullorissat angalasut, nunarsuatsinnut assingusut exoplanetinik taaneqartartut arfineq-marluk ullorissamik ataatsimik kaaviaarfeqartut oqaluttuarisaanermi siullerpaamik nassaarineqarsimapput. Amerikamiut avataarsuanik misissuisoqarfiat, Nasa, tusagassiortunik katersortitsilluni taama ilisimatitsivoq.
Exoplaneti tassaavoq ulloriaq angalasoq seqiniunngitsumik ullorissamilli allamik kaaviiaarfeqartoq.
Liègep Universitetiani STAR Institutemeersoq Michaël Gillon suleqatini peqatigalugit ullorissanik angalasunikl Trappist-1-ip eqqaaniittunik nassaartuuvoq.
Ilisimatuut isumaqarput ullorissat ilaat pingasut imeqarsinnaasut.
Trappist-1-ip qaamarngata misissuiffigineratigut ullorissat angalasut nassaarineqarput. Taarsititsilluni periaatsimik taaneqartartoq atorlugu exoplanetit amerlanersaat nassaarineqarput.
/ritzau/