Ulloq unnuarlu paaqqinnittarfinni perorsaasut akissarsiakippallaarput

- Nalunngilarput Kalaallit Nunaanni perorsaasutut ilinniarsimasut amerlaqisut taakkuli nalunngilaat suliffissat sorliit akissarsiarissaarfiunerusut. Allaammi pisiniarfinni sulisut perorsaasunit akissarsiaqarnerupput, ulloq unnuarlu paaqqinnittarfimmi Aja-mi 1999-mili ningiuusoq Fie Hansen oqarpoq.

Taanna isumaqarpoq pissusissamisoornerussasoq perorsaasut meeqqanik inuusuttunillu naalasseriitsunik sullissisut perorsaasunut allanut sanilliullugit akissarsiaat qaffanneqasinnerulersinneqarpata.

- Sullitat kikkuugaluarpataluunnit akissarsiat assigiipput. Taamatut ingerlaqatigiinneq ajunngikkaluarpoq, kisianni meeraqarpoq sullikkuminaatsunik ilaatigullu sullissisunut ulorianarsinnasunik. Tamanna immikkut akilerneqarneq ajorpoq, Fie Hansen uparuaavoq.

Perorsaasut akissarsiakinnerat qangali ilisimaneqarpoq. Pissutsit taamaannerannut sulisitsisut minnerunngitsumik pisortat aammali perorsaasut peqatigiiffiat akisussaapput. Tassami perorsaasut tunngaviusumik akissarsiaat ullumikkut 17.580 koruuniusut, Fie Hansen nassuiaavoq.

- Suliassaqarfik taanna nakernaatsutut inissisimavoq kisianni immitsinnut qiviarutta nassuerutigisariaqarparput peqatigiiffik nammineq toqqagarigatsigu. Tassami ilaasortaq peqatigiiffik ilusilersugaraat. Taamaattoq isumaqarpunga pissutsit pitsanngorsarniarlugit peqatigiiffik ilungersuuteqanngippallaarsimasoq. Assersuutigiinnarsinnaavagummi peqqissaasut ilinniartitsisullu uagutsinniit akissarsiaginneroqisut, Fie Hansen oqarpoq.

Perorsaasut peqatigiiffianni PIP-mi siulittaasoq Kaaliina Skifte isumaqarpoq isumaqatigiinniarnerni peqatigiiffik qajassuartariaqartoq.

- Namminersorlutik Oqartussat kommuunillu isumaqatigiinniarfigineqartarput tassanilu aningaasaqarniarnikkut inissisimaneq apeqqutaasarpoq. Tassa isumaqatigiinniaraangatta akisussaaqataasarpugut. Piumasaqarniaannarsinnaanngilagut, Kaaliina Skifte oqarpoq.

Taassuma nassuerutigaa perorsaasut akissarsiaasa kinguussaanerat arajutsisimanngilluinnarini.

- Nalunngilluinnarparput sulisunut allanut assersuuffigisinnaasatsinnut sanilliulluta akissarsiagut kinguussaasorujussuit aamma akissarsiat qaffanneqarnissaat tamatigut ilungersuutigisarparput. Isumaqarpunga suliaq naammaginartumik naammassisarlugu, Kaaliina Skifte oqarpoq.

PIP'p akissarsiat pillugit isumaqatigiissutaa ukiormanna atorunnaarpoq nutaamillu isumaqatigiinniarnerit oktoberip arfineq pingajuat aallartinneqarput. Kaaliina Skiftep oqaatigisinnaannginnerarpaa isumaqatigiinniarnerit maanna qanoq ingerlanersut taamaattoq kingullermik angusaasunut sanilliullugu akissarsiat qaffariaataata annertunerunissaa anguniarneqartoq unnerlugu.